Gaur egungo neska-mutikoek mota guztietako jostailuak dituzte eskura. Jostailu horien arrakastak zerikusia du, batez ere, bi faktorerekin: lotuta egotea haurraren garapen ebolutibora zein haurraren interesekin harremana izatea.

16702116170_13d85b9ec7_z

Material ez egokituek bi baldintza horiek betetzen dituzte, eta oso interesgarriak dira haurraren irudimena delako jolasa sortzen duena. Finean, funtzio zehatzik gabeko elementuak dira, eta horregatik dira hain interesgarriak. Jostailu egitura ez duten materialei buruz ari gara: enbor zatiak, makilatxoak, harriak, hostoak… Ez dira funtzio zehatz baterako sortutako jostailuak edo jolasak puzzle bat edo araututako jolas baten modura.

Jolas sinbolikoa sustatzeko

Komenigarria da etxeko jostailuen artean material ez egituratuak eskura edukitzea. Arrazoi nagusia da jolas sinbolikoa sustatzen dutela. Esaterako, ume bati sukalde bat eskaintzen badiogu imitatu egiten du, ez du jolas sinbolikoa sortzen.

Jolas sinbolikoa sortzen da haurrak material bati fantasiazko funtzio bat ematen dionean: esaterako, harriak kotxe bihurtzen dituenean edo diru trukeak egiteko hostoak erabiltzen dituenean. Argi eduki behar dugu imitatzea ez dela sortzea. Imitaziozko jolasa ere interesgarria da, baina ez da jolas sinbolikoa.

Betiko jostailuekin batera

Ohiko jostailuak ez dira txarrak. Baliagarriak, beharrezkoak eta dibertigarriak dira. Kontua ez da batzuen edo besteen artean aukeraketa egitea baizik eta jostailu egitura ez duten materialei ere lekua egitea. Hau da, ohiko jostailuekin batera material ez egituratuak eskura edukitzea.

Interesgarriak dira pentsamendu sortzailea pizten dutelako, eta haurrak egokitzen dituelako bere garapen ebolutibora. Esaterako, hondarretan jolasean diharduen haur txiki batek zuloak egiten ditu, eta haur nagusiago batek arkeologoetara egin dezake jolas.

Jostailu mota honek, gainera, gain-estimulazioa saihesten du. Ez dute ez argirik, ez soinurik. Hala, ez dute kanpo estimulurik. Bestela esanda, haurraren irudimenak egiten du lan jolasaren magia sortzeko.

Material ez egokituak

. Naturarekin lotutakoak: makilatxoak, harriak, enbor zatiak, pinaburuak, oskolak…
. Birziklatuak: tapoiak, komuneko papereko kartoizko euskarriak, kortxoak, plastikozko botilak, kartoi zatiak…
. Erositakoak: gero eta gehiago dira jolaserako material ez egituratuak saltzen dituzten saltokiak.

 

Albistearen iturria eta gaiaren inguruko informazio gehiago hemen.

Argazkiaren iturria hemen.