Osasunaren Mundu Erakundeak ohartarazi du 2050erako biztanleriaren erdiak miopia izango duela.

MIOPIA dagoenean, ez da urrunean ondo ikusten, lausotuta ikusten da eta argiak haloekin agertzen dira. Miopia dutenek hobeto fokatzeko begiak erdi itxi edo pixkat kliskatzen dituzte.

Normalean, ez da zaila izaten miopea diagnostikatzea, norberak edo ingurukoek antzematen baitute.

Alde batetik, faktore hereditarioa egoten da, baina gaur egungo gure bizimoduak ere eragin handia du.

Denbora luzez egoten gara gertuko zereginetan eta honek fokatze blokeo bat eragin dezake, urrutira ez dugulako begiratzen.

Mantentzen ditugun posturak ere eragina dute, tabletekin, mugikorrekin eta halakoekin burua makurtuta izaten dugu eta honek ere eragin handia du ikusmenean.

Pentsa dezakegu miopia, betaurreko, ukipen lente edo ebakuntza bidez konpentsatua geratzen dela. Modu batean bai, begiak laguntza gabe ondo ikustea lortzen dugu eta, baina, miopia izateak gauza gehiago ditu atzetik.

Miopia duten begiak handiagoak izaten dira, pentsa dezagun gure begia globo bat dela eta begia miopea denean globoa gehiago puztuko bagenu bezala da. Beraz, geroz eta miopia altuagoa izan, gure begia handiagoa (globoa puztuagoa) izango da.

Begi horren erretina (atzeko partea, globoaren barruko aldea) oso findua egongo da, erretinan dauden zainak eta makula  ere ez dira guztiz osasuntsu egongo, besteak beste.

Hortaz, nahiz eta pertsonak ondo ikusi ukipen lente, betaurreko edo ebakuntzaren ondorioz, urteroko azterketak egitea komeni da, miopeak izango dira beti eta noski ez da berdina 1Dp, 3Dp edota 5Dp izatea.

Bere maila altuenetan nabarmen handitzen dira patologia aukerak. Erretina patología garrantzitsuak, hala nola glaukoma, katarata, makula arazoak edo erretina askatzea.

Horregatik, oso garrantzitsua da baliabideak jartzea haien progresioa kontrolatzeko, batez ere haurtzaroan eta nerabezaroan.

Eta, nola egin aurre miopia igoera horri?

Alde batetik, oso garrantzitsua da zaintza berezi batzuk izatea. Gertuko zereginetan aritzean, urrutira begiratzea komeni da 5-10 minuturo. Bestalde, garrantzitsua da kalean, naturan denbora egotea, eguneko argitasuna oso lagungarria baita begiak fokatze hori lasaitzeko.

Ikasten edo telebista aurrean gaudenean, inguruko argi suabe bat piztua izatea komeni da.

Bestalde, atzean geratu da jada miopia ez igotzeko, hasieran ez konpentsatzea edota neurri txikiagoan konpentsatzea.

Azkenengo urteetan jakina da, ebidentzia zientifikoa medio, tratamendu espezifikoak dutela eragina.

Horien artean optometristok erabiltzen ditugunak:

Hauek denetan hainbat ikuspegi optikoren bidez, begiaren handitzea eragozten duen desenfokatze miopiko periferikoa lortzen saiatuko gara.

  1. Egunez erabiltzen diren ukipen lenteak. Miopia kontrolatzeko bereziki diseinatutakoak, diseinu multifokala duten eguneko ukipen lenteak dira.
  2. Orto-k (Gauez erabiltzeko lente zurrunak). Ukipen lente hauek gauez erabiltzen dira eta kornea azalera aldi baterako birmoldatzen dute, erdiko kornea lautuz eta erdialdeko eremu periferiko kurbatuz.
  3. Betaurrekoetan etengabe erabiltzen diren lente oftalmikoak.

Kasu honetan, betaurrekoko lenteek dute miopia kontrolerako diseinu berezia.

Bestalde oftalmologoek atropina moduko tratamendu farmakologiakoak erabiltzen dituzte.

Egoera bakoitza bakarra da eta kasu bakoitza aztertu beharra dago tratamendu egokiena erabiltzeko.