Motibazioa galtzen dutenean nola lagundu

Gertatzen da motibazioa galtzea. Denoi gertatzen zaigu, eta haurtzaroa ez da salbuespena. Alferkeria, interes falta, sozializazio arazoak… zergatiak askotarikoak izan daitezke. Kezkatuko gara egoera iraunkorra denean, eta gure seme-alabaren egunerokoan eragina duenean.

Zergatia ulertu

Egoerari buelta emateko lehen urratsa motibazio falta zerk eragiten duen ulertzea da. Horrela dio Entrepadres webguneko blogaria den Maria Jose Roldan psikologoak. “Askotariko motiboak egon daitezke: sozializazio arazoak eskolan edo inguruko lagunekin, elikadura arazoak —energia eza—, auto-estimu txikia, beldurra porrotari…”. Aukeretako bat da motibazio eza jarduera konkretu batek eragitea. “Umeak bere zaletasunak ditu eta gurasook onartu behar dugu zaletasun horiek ez dutela zertan gureekin bat etorri behar. Seme-alaben irizpideak eta gustuak onartu egin behar ditugu”, dio Roldan psikologoak.

Nola jokatu

Motibazio eza ekarri duen faktorean eragin behar dugula, eta egoerak gainditzen bagaitu laguntza profesionala eskatzea komeni dela dio adituak. “Ez esan umeari ‘nagia’, ‘alferrontzia’ edo ‘aspergarria’ dela. Sinistu egingo du, eta ez da lagungarria izango. Modu positiboan hitz egin beti eta saia zaitezte laguntzen eta bere aldartea hobetzen”.
Gustukoak dituen jarduerak proposatu umeari, eta ahalegin berezia egin bere adinarendako egokiak direnak aukeratzen. Helburua da haurra motibatzea eta bere interesa piztea. Ez eman garrantzia gehiegi emaitzei eta bai jarduerak sortzen duen gozamenari. “Emaitzetan zentratzen bazarete eta onak ez badira, umeak interesa galduko du eta ez du jarduerarekin aurrera egin nahi izango”.

Albistearen iturria hemen.

Argazkiaren iturria hemen.