Motrizitate fina lantzeko ideia interesgarriak sarean

Prekinders.com atari digitalean eduki interesgarri pila aurki daitezke, tartean haur txikien motrizitate fina lantzeko proposamen errazak eta interesgarriak. Kanikak, pintzak, sukaldeko tresnak… etxean tresna baliagarri ugari ditugu umeentzako jarduera entretenigarri eta hezitzaile ugari prestatzeko.

Sandra Hernandezek azaltzen duen moduan motrizitate fina giharren mugimendu txikien eta begien arteko koordinazioa da. “Mugimendu horiek atzamarren bizkortasunarekin eta mugimenduekin dute zer ikusia. Azken batean, bizitzan beharrezkoak diren mugimendu txiki guztien garapena ahalbidetzen duen motrizitatea da: idazteko, lokarriak edo botoiak lotzeko, teknologia berriak maneiatzeko, bazkaltzeko… Ezinbestekoa da”.

Motrizitate fina erabakigarria da haurren garapen egokirako. “Arlo horretan egiten dituen aurrerapenek bere eguneroko bizitzan eragin handia daukate, izan ere, inguruaren esperimentazioaren eta ikaskuntzaren ateak irekitzen dizkio. Ondorioz, bere garapen intelektuala egokia izatea bermatzen du”.