Tik Tok eta YouTube plataformak kontsumo handiko sare sozialak dira eta erabiltzaile horien artean asko eta asko gaztetxoak dira. Badirudi tendentzia orokorra dela Tik Tok aurretik kokatzea.

Duela bi urte –2020ko ekainean– kokatu zen Tik Tok YouTube-ren aurretik lehen aldiz. Ordutik alde hori handitzen joan da: albiste da, egun, mundu osoko gazteek denbora gehiago igarotzen dutela Tik Token YouTuben baino: zenbait herrialdetan –AEB, EB, Espainia…– bikoitza ere bai.

Gazteen erabilera aztertuta bien arteko aldea gero eta nabarmenagoa da.

Questodio emandako datuak

Gurasoen kontrolerako Questodio zerbitzuak egin du ikerketa. 400.000 familia baino gehiagoren nabigatzeko ohiturak aztertu dituzte, eta webguneetara sartzeko datu errealak hartu dituzte kontuan.

4 eta 18 urte arteko gazteen kontsumo ohiturak aztertu dituzte, eta munduko batez bestekoak dio egunero, batez beste, 82 minutuz ikusten dutela Tik Tok gazteek. YouTube, berriz, 75 minutu da eguneroko batez bestekoa.

Zenbait herrialdetan Tik Tok kontsumoak YouTuberrena ia bikoiztu egin duela ere ondorioztatu dute. Erresuma Batuan, esaterako, eguneko batez besteko Tik Tok kontsumoa 102 minutukoa da eta YouTube-rena 53 minutu.

Egia da, bestetik, asko hazi dela oro har gisa honetako kontsumoa. Bi plataformetan egin du gora kontsumoak. 2019an, esaterako, YouTube zen izarra eta  48 minutuko ikuspena zuen bataz beste egunero.