Munduko jolasen bilduma eskuragarri jarri du Txatxilipurdi elkarteak bere webgunean. 2005.urtean argitaratu zuen Arrasateko elkarteak Munduko jolasen bilduma, kd formatuan zabaldu eta merkaturatu zen.

munduko_jolasak270

Bilduma honetan Munduko bost kontinenteetako jolas ezberdinak bildu zituzten, jolas bakoitzari fitxa bat gehituz. Fitxa hauetan, jolaserako egokia den adina, jolaserako beharrezko materiala, eta lantzen diren alderdiak biltzen ziren, jolasaren azalpenarekin batera.

100 jolas baino gehiago aurkitu ditzakegu bilduman eta guztiak esparru ez formalean erabiltzeko baliabide hezitzaile moduan ulertu daitezke. Jolas bildumarekin batera  erabileran laguntzeko testu bat ere gehitu zitzaion, hausnarketa gomendio eta ideia ezberdinekin.

 

JOLASA pertsonon bizitzarekin irmoki loturiko jarduera dugu eta gizakiaren historiaren lehenengo pasarteetatik berarekin egin du gaur arterainoko bidea. Kultura ezberdinetan ibilbidea ezberdina izan da. Hala ere, gai hau aztertzerako orduan, aipagarria da informazio iturri ezberdinetan jolasaren edo funtzio ludikoaren gainean dagoen hutsune nabarmena. Informazio gabezia honek funtzio ludikoak historian zehar izan duen balorazio eskasa nabarmentzen du. Bilduma honen helburua jolasaren aldarria egitea ere izan zen!