Nafarroa erdialde eta hegoalde zabalean, Ager eremuan, euskarari bultzada emateko sortu den mugimendua da Agerraldia. Euskararen aldeko ekintza eta jarduera ugari egingo dituzte, hizkuntzaren ezagutza, erabilera eta horrekiko jarrera baikorra sustatzeko asmoz.

Agerraldiko kide Ibai Sueskunek azaldu du honako hau Errigoratik datorren proiektua dela, nahiz eta izaera propioa duen: “Errigoran hausnarketa egin genuen eta ikusi genuen Nafarroa hegoaldean euskalgintzari egiten diogun ekarpena ondo dagoela, baina euskarak zerbait gehiago behar zuela”. Hala sortu zuten Agerraldia; Ager eremuan, hots, Garestik Kortesera eta Zangozatik Bianarako eremuan eragin gura duen mugimendua.

Euskararen normalizazioaren alde

Ikastoletako, euskaltegietako eta D ereduko lerro berrien euskalduntze lana babesten eta bultzatzen jarraituko dutela azaldu du Sueskunek, “Ikastolak, AEK-k eta Sortzen-ek eremu horretan dituzten proiektuak ezinbesteko baititugu”. Horretaz gain, euskararentzat espazio berriak irabazteko ekintza praktikoak babestu, lagundu eta sustatuko dituzte Agerralditik.

Aisialdian, eskaintza kulturaletan, kirol jardueretan, lan munduan, erakundeen esparruan edo formazio ekimenetan euskarak dagokion lekua izango duen egitasmoak gauzatuko dituzte. Agerraldiaren zeregina “iraunkorra” izango da, espazio berriak ez ezik, euskarari bideratutako “begirada berriak” irabazi gura dituztelako. “Poliki-poliki, posizionamendu berri bat lortu behar du euskarak; eraginkortasuna, aliantza gaitasuna, bertatik bertarako izaera eta halako balioak nabarmenduz”, zehaztu du.

Aurrera begira, ekintza ugari

Euskalduntzea, kirola, jendartea, hezkuntza eta kulturari lotutako ekintza ugari antolatu dituzte datozen hilabetetarako. Egitarau osoa www.agerraldia.errigora.eus webgunean kontsulta daiteke.