Nafarroako ikastolen mugimenduak hamarkada luzez egindako ibilbidearen ispilua da Izan, ezagutu, egin eta elkarrekin bizi dokumentala. Askotariko testigantzak jasotzen ditu ordu erdi pasatxoko ikus-entzunezkoak eta aukera ematen du praktikak ezagutzeko eta lortutako espazioez ohartarazteko.

Nafarroako Ikastolen Elkarteak ekoiztu du dokumentala. “1976an eratutako irabazi asmorik gabeko bigarren mailako hezkuntza-sozietate kooperatibo honen egiteko nagusia euskarazko kalitatezko hezkuntza sustatzea da”, azaltzen dute aurkezpen oharrean. “Euskara Nafarroako ondare immaterial handienetako bat izanik, Nafarroako Ikastolen Elkartea osatzen duten ikastolek, euren ibilbidea helburu horietara zuzendu dute, hots, euskara eta euskarazko hezkuntza sustatzera, gure nortasun kulturalaren funtsezko ondare immaterial gisa. Nafarroako ikastolek euskararen, euskarazko hezkuntzaren eta euskal kulturaren ezinbesteko hedapena egin dute Nafarroako herri eta eremu ezberdinetan, baita hizkuntza diskriminazioak jasaten dituzte eskualdeetan ere”.