Naturako elementuekin egindako jolasgune berria Izurtzan (Durangaldea)

Durangaldean dago Izurtza herria, Urkiolako natur gunetik oso gertu. Zaharkituta zegoen erreka bazterreko Santo Tomas parkeko umeentzako jolaslekua, eta naturako elementuekin osatutako eremua egiteko baliatu dituzte berritze lanak. Europan gero eta gehiago erabiltzen ari diren eredua da.

Zuhaitz enborrak, belar naturala, harriak, landareak eta bestelako elementu naturalak erabiliz atondu dute jolasleku berria. Berritu ostean aurretik zegoen jolaslekuko elementu batzuk ere berrerabili dituzte: eserlekuak eta txirrista, esaterako.

Irudimena lantzeko estimulua

Helburu horrekin erabaki dute jolasgune berriaren diseinua Izurtzan. Gune berria, jolasteko ez ezik gaztetxoek irudimena askatzeko gune izatea ere nahi dute, eta abagunea baliatu dute jolastokiari nortasun hezitzaileagoa emateko. “Umeek naturagaz kontaktu zuzenagoa izatea gura dugu”, esan du Lorea Muñoz alkateak. Guneek iradoki egingo dute, eta umeek imajinatu: “Aurreko jolasguneak ibilbide bera zuen beti, eta ez zuen gazteen irudimena sustatzeko aukerarik eskaintzen”.

Albistearen eta argazkiaren iturria: Anboto.org