Haur eta gazteek poltsikoko telefonoan igarotzen duten denbora nahiz erabilera guraso askorendako kezka iturri da. Geroz eta gehiago hitz egiten da halako gailuek haur eta gazteengan sor ditzaketen kalteez eta horietan eskura dituzten edukiek duten eraginaz; hala nola, sare sozialak, pornografia, bestelako edukiak… Horren aurrean, ikerketa batek erakutsi du gurasoek pantailetan ematen duten iraupenaren araberakoa dela seme-alaben jarduna pantailaren aurrean, hein handi batean.

Ikerketaren egilea Jason M. Nagata da eta hark dio El País egunkarian pantailen erabileran etxean arauak ezarriz gero, gurasoek ere arau horiek bete behar dituztela dio. Esaterako, bazkaldu bitartean poltsikoko telefonorik ez erabiltzeko agintzen bada, gurasoek ere bete egin behar dute arau hori.

Ikerketak beste faktore batzuk ere aipatzen ditu. Bazkalorduan edota logelan gauez gailuak erabiltzea, esaterako, lotuta dago erabilera arazotsuagoekin.

Azterketak nabarmentzen duen beste “hutsegite” bat da gailuak “sari edo zigor” modura erabiltzea, horrelako estrategiek erabilera handiagoa eta okerragoa bultzatzen dutelako. Adituaren arabera, teknologia “normalizatzea” da bidea mugak jarriz eta akonpainamendua eginez, heziketaren beste arloetan egiten den bezala.