Nerabeek, bataz beste, 150 euro gastatzen dituzte hilero, eta gertuko senitartekoak dira diru-iturri nagusia

Nerabeei zuzendutako atari digitala da Keepunto.com, eta nerabeen ohitura finantzarioen inguruan egin duten ikerketaren aurrerapena eskaini dute egunotan. Behin betiko txostena otsailean aurkeztuko dute. Webguneko ordezkari Raul de la Cruzek jakitera eman duenez nerabeek, bataz beste, 40 euroko ordainsaria jasotzen dute hilero. “Hilean egiten duten gastua, ordea, 150 eurokoa da bataz beste. Nola izan daiteke hori? Hilero aitortua duten 40 euroko ordainsariaz gain aurkitzen dutelako diru gehiago eskuratzeko modua: zinemara joateko, opari bat egiteko, arropa erosteko… Gurasoek ordainsari txikiagoak ematen dizkiete, eta gurasoak ez badira aitona-amonak, izeba-osabak… Inguruko senitartekoak dira euren diru-iturri nagusia”, azaltzen du de la Cruzek. Hala, adituaren esanetan, inor benetan konturatu gabe nerabeek hilean 150 euroko gastua egitera iristen dira. “Bataz bestekoak kontu handiz hartu behar dira beti, baina gure ikerketaren arabera nerabeek arropa —26 euro hilean—, janaria —24 euro hilean—, eta teknologia —20 euro hilean— kontsumitzen dituzte, besteak beste“.

Gurasoen erantzukizuna

Kontsumitzaile nerabeen argazkia egin dute Keepunto-koek, baina arduradunaren esanetan ondo asko izan zitekeen nerabeen gurasoen argazkia. “Gurasoak gara nerabe horien hezkuntza finantzarioaren erantzuleak, eta horrelako jokabidearekin ez gara nerabeen mesedetan ari. Esfortzuaren eta ahaleginaren kultura gehiago landu beharko genuke”, esan du. De la Cruzek onartzen du krisi ekonomikoak eragina izan duela nerabeen egunerokoan: “Orain bost urte nerabeen %65-ak jasotzen zuen ordainsari bat astero. Gaur egun %65-ak ez du ordainsaririk jasotzen”, adierazi du.

Adituaren esanetan erreminta finantzarioak eskaini beharko genizkieke nerabeei: “150 euro gastatzen dituzte hilero, eta asko eta asko ez dira jakitun ez dutelako erremintarik dituzten gastuen jarraipena egiteko”. Nerabeak konturatzen dira eta onartzen dute trukean ezer egin barik lortzen dutela hileroko ordainsaria. “Aurrezten eta euren dirua kudeatzen erakutsi beharko genieke. Batzuetan aurreztu egin behar da, beste batzuetan erosi edo inbertitu… Gastuak gestionatzen eta erantzukizunez erabakiak hartzen erakutsi beharko genieke”. De la Cruzen esanetan gurasook trukean ezer eskatu gabe seme-alabak finantzatzen jarraitzen badugu, ez dute ahalegintzeko beharra sentituko. “Eta kuriosoa da ze erronkak ipintzen badizkiezu, normalean gogoz saiatzen dira”, dio adituak.

Argazkiaren iturria hemen.

Albistearen iturria hemen.