Aurreko urteetan ekimenak jasotako erantzuna ikusita beste urte batez errepikatzea erabaki dute. Hala, herriko ikastetxeek, Udalak eta kiroldegiak bat egin dute proposamen bateratua egiteko. Atxabalta Mugi proiektuaren barruan dago ekimena, eta 16 urteko 133 gaztek parte hartuko dute lau astetan zehar.

Bigarren Hezkuntzako laugarren mailako ikasleei zuzendutako ekimena da. Lau astez elkartuko dira ikasle horiek Ibarra kiroldegian Gorputz Hezkuntza irakasgaiari dagokion orduetan. “Kiroldegiaren eskaintza ezagutzea eta bizimodu aktibo eta osasuntsua izatearen garrantzia azpimarratzea da helburua”, azaldu du Atxabalta Mugiko arduradun den Athlon kooperatibako Maialen Alkortak. Ikasleen adinaren aukeraketaren arrazoia zein den ere jakinarazi du: “Kirola uzten duten gazteen tasa handiena dagoelako adin tarte horretan”.

Ibarran eskaintzen diren hiru kirol jarduera probatu ahal izango dituzte gazteek lau aste horietan: GAP, cycling eta circuit training. Ekimena amaitutakoan, nerabeen ordutegietara egokitutako ikastaro hauen eskaintza egiteko aukera aztertuko dute kiroldegian. “Horrela, eskola ordutegitik kanpo kirola egiten jarraitu ahal izango dute, proiektuaren helburua nerabezaroan jarduera fisikoa sustatzea baita”, berretsi du Alkortak.

Hiru hilabete pasatutakoan, jarraipena egingo diete parte-hartzaileei proiektu horrek euren jarduera fisikorako ohituretan izan duen eragina aztertzeko.