Euskadiko Orkestraren Musika Gela hezkuntza-ziklokoen denboraldiko bigarren ekoizpena da Nire ama antzara ikuskizuna. Ia 30 udalerritako 3 eta 6 urte bitarteko 2.200 ikasle baino gehiagori zuzendutako kontzertu ugari antolatu dituzte honako herrietan:  Aia, Aizarnazabal, Alegia, Altzo, Anoeta, Astigarraga, Beasain, Berrobi, Deba, Donostia, Errenteria, Ezkio-Itsaso, Gabiria, Gasteiz, Hernani, Itsasondo, Irun, Legazpi, Legorreta, Lizartza, Mendaro, Oiartzun, Olaberria, Urnieta, Zarautz, Zegama eta Zestoa.

Maurice Ravelen lagun batzuen seme-alabentzat idatzitako lana da Ma mère l’oye –Nire ama antzara euskaraz– eta Charles Perrault idazlearen ipuinetan oinarritzen da. Euskadiko Orkestraren proposamenak hitzen ordez irudiak jarriko ditu zuzeneko musika duen itzal-antzerki batean, eta haur bakoitzaren esku utziko du kontakizunak norbere iruditerian berreraikitzeko lana. Lana interpretatzeko ardura haize-boskote batek izango du: Oihana Kontxeso (flauta), Oscar Diago (oboea), Luis Camara (klarinetea), François Proud (fagota) eta Marianne Tauzin (tronpa). Gidoia eta gida didaktikoa Marta Bocosek egin du, Musika Gelaren koordinatzaile Mikel Cañadaren jatorrizko ideian oinarrituta.M

Bihar Miramonen

Otsailaren 1ean Gasteizen egin bezala, bi kontzertu egingo dituzte bihar Miramonen, 11:00etan eta 12:30ean hurrenez hurren. Bigarren kontzertua, saio lasaia izango da eta famlia guztientzat irekita dago: “Desgaitasunen bat duten kideak dituzten familientzat zein halako kiderik ez dutenentzat”.

Sarrerak salgai daude, Euskadiko Orkestraren webgunean 5 eurotan 12 urtetik beherakoentzat eta 8 eurotan adin horretatik gorakoentzat. Kontzertu egunean, Miramongo leihatilan ere eskuratu ahalko dira lekua baldin badago.