Ikasleen ohiko osagarriak dira motxilak; behar-beharrezkoak eskola materiala alde batetik bestera eramateko. Askotan, edertasuna erreparatzen zaio erosi edo aukeratzerako orduan, baina horrekin batera datoz arazoak; esaterako, bizkarreko mina. Zer nolako motxila aukeratu behar da seme-alabentzat?

Leire Azpiazu erizainak sare sozialetan azaldu duenez, oso garrantzitsua motxilaren tamainari eta pisuari erreparatzea. Seme-alaben bizkarraren neurri bera izan behar du, eta ezin du gainditu txikien pisuaren %10. Gainera, ainguraketa finkoa izan behar du, sorbaldetatik ez erortzeko. Gurasoei gogorarazi die, “motxilarik handiena ez dela mesedegarriena beti”.

Baina nola jarri behar da motxila? Erizainaren esanetan, zakuaren goiko aldeak sorbalden parean geratu behar du, eta lunbarretan finkatu behar du, gerria baino bost zentimetro gorago. Minak ekiditeko, bizkarrari eta lunbarrei itsasita eraman behar da.

Azken gomendioen artean, hurrengoak nabarmendu ditu Azpiazuk. Alde batetik, bi sorbaldetan jarrita eramatea motxila eta bizkarrean erdiratuta; ondo eutsita eta helduleku zabal eta barrubigunekin. Beste alde batetik, pisu handiko zatiak bizkarrari ahalik eta gehien itsatsita eraman behar dira.

Barruko kargarekin ere tentuz ibili behar dela dio. Ahalik eta egonkorren eraman behar da karga, alde batera eta bestera ez dadin mugitu eta konpartimentutan banatuta.