Azken hamarkadako eskolara itzulerarik garestienaren aurrean gaude ekonomian doktorea den Massimo Cermelliren esanetan. Horren errudun nagusia inflazioa dela dio eta ez zaio arrazoirik falta, azken urtean ikusi baitugu nola hazi diren eguneroko gastuak. Produktu guztien prezioak egin du gora: arropena, oinetakoena…

“Inflazioa igo dela argia da, baina badirudi geratzen ari dela. Baita ekonomialariok eskuartean ditugun datuek diote, barneko inflazioa lasaitzen doala. Beraz, lasaitasun mezua da”, dio ekonomialariak.

Zenbat gastatzen dugu?

Prezioen igoerei dagokienez honako datuak eman ditu: papertegian %6,4 igo dira prezioak; arropetan %5; liburuetan %4,6 eta motxiletan %4.

Gutxigorabehera eskolarako itzuleran seme-alaba bakoitzarekin 500 euro gastatzen direla aurreratu du. Horietatik 200 euro liburuetan (erosketa gastuen %40), arropa/uniformeetan 120 euro (%28) eta 140 euro eskolako materialetan (28). “Hori seme-alaba batekin, baina biderkatu seme-alaba bakoitzarekin… Zenbaiten kasuan hipotekako kuota bat izan daiteke), dio adituak.

Nola aurreztu eskolarako itzuleran?

Materialak erosterako orduan kontuan izan beharreko zenbait proposamen egin ditu Massimo Cermellik:

  1. Garrantzitsua da zuhurra izatea. Aurreikusi egin behar da gastua zein izango den. Zerrenda bat egitea egokia izango litzateke. Pentsatu zer den beharrezkoa eta zer ez eta orduan behar duguna baino ez da erosi behar.
  2. Kontuz ibili behar da eskaintzekin. Batzuetan 10 koaderno X prezioan dituzula esaten dizute. Baina ez; behar dena erosi soilik. Horrelakoetan, behar ez dena erosten baita.
  3. Prezioak konparatu. Garrantzitsua da. Badakit hegaldiekin, kotxe alokairuekin… egiten dugula. Baina leku ezberdinetan begiratuz gero, prezio ezberdinak ikus daitezke.
  4. Beste aukera bat izan daiteke kontsumo kolaboratiboa. Zenbait herritan liburu bankuan sortu dituzte. Ohikoa izaten da liburuak seme-alaben artean berrerabiltzea, baina hori multzo handiago batean egin daiteke. Horrelako kasuetan, garrantzitsua da liburuak egoera onean izatea.
  5. Beste aukera bat izan daitezke bigarren eskuko dendak.
  6. Markekin ere kontuz. Badaude kalitate oneko marka zuriko produktuak.

Iturria: ETB2ko Nos echamos a la calle saioa.