Gizakiarentzako garrantzitsuak dira harremanak ingurukoekin, baita gizarte-onarpena ere. Sare sozialak jendea ezagutzeko —gertuko nahiz urruneko— bide erraza dira; eta etengabeko erabilera horretan dabiltza nerabeak, besteak beste. Eta hor ere aurkitzen dute gizarte-onarpena, eta eragina du autoestimuan. Horren inguruan idatzi du Garbiñe Agiriano psikologoak Puntua aldizkarian.

Gizakiak harreman soziala behar du bere burua pertsona gisa sentitzeko. Bizitzaren lehen urteetan ezinbestekoa da beste norbaitekin harremanetan egotea, begiratu eta ezagutu gaitzan geure burua munduan kokatzeko, zaintzailearekin duen harremana –batez ere, amarekin– funtsezkoa den bitartean.

Hazi eta gero eta independenteago bihurtzen garen heinean, beharrezkoa da gizarte-onarpena nahiz gure autoestimurako identifikatuta sentitzen garen talde jakin batzuetako kide sentitzea.

Horri dagokionez, sare sozialak aliatu handiak dira jendea ezagutzeko, harremanak hasteko eta urruneko harremanak izateko. Gainera, informazio-iturri garrantzitsuak dira, hainbat gairekin eguneratuta egoteko eta beste batzuekin kezkak partekatzeko. Baina eskarien zurrunbilo honetan, mundu mailako harreman handiena eta, aldi berean, bizi-gogobetetasun txikiena dugun garaian gaude.

Sare sozialen alde iluna

Sareak egoki erabiltzeak aukera ugari ematen badizkigu ere, ohikoa da sare
sozialak gaizki erabiltzea, eta horrek erabiltzaileari ondorioak ekar diezazkioke. Batetik, teknologia berriek berehalako esker-saria ematen dutenez, frustrazioarekiko tolerantzia txikia garatzen laguntzen dute; batez ere, txikitatik hasten direnean.

Frustrazioarekiko tolerantziarik eza dela-eta pazientzia eta erresilientzia
gutxiago izaten dugu eta mezu baten zain egotea odisea hutsa izan daiteke;
hala porrot txiki bat benetako akats gisa bizi daiteke.

Gainera, sareek eskaintzen duten berehalako esker-saria dela-eta, jokabide kaltegarriak sortzen dira, hala nola eskuko telefonoaren etengabeko azterketa, aplikazio mugikorren gehiegizko erabilera eta, ondorioz, prokrastinazioa; izan ere, aurrera egiten dugunean, norberaren betebeharrak eta proiektuak atzeratu egiten ditugu, eta, jarduera hori denboran luzatzen bada, porrotsentimendu handiak eta autoestimu txikia eragiten ditu.

Autoestimuan eragina

Sare sozialetan parte hartzeari dagokionez, pertsona batzuen autoestimua beren elkarreraginei ematen dizkieten erantzunen mende dago erabat: kritika positiboak jasotzen badituzte, segurtasun-sentsazio faltsua izango dute; eta erreakzioak negatiboak badira, aldiz, sentsazioa guztiz suntsikorra
izango da. Horregatik, garrantzitsua da kontuan hartzea iritzi publikoari
azaltzeak ez dituela beti nahi diren ondorioak izaten.

Bestalde, sare sozialak erabiltzeak beste pertsona batzuekin konparatzea errazten du eta bere buruaren pertzepzio negatiboa eta autoestimu baxua garatzen du. Horregatik, oso garrantzitsua da hauxe kontuan izatea: sareetan gertatzen den guztiari garrantzia ematen badiogu, obsesionatu egin gaitezke eta sentimendu negatibo eta suntsikorrak atera daitezke gure emozioak eta nortasuna kaltetzen.