Haurrekin batera ipuinak irakurtzeko gako batzuk eskaintzeko Juan Carlos Alonso haur psikologoaren hitzak ekarri ditugu gaurkoan.

Elkarrekin irakurtzea komunikazio ekintza da, ekintza afektiboa. Horretaz oharturik, edozein komunikazio ekintzatan bezala, ez da esandakoarekin edo hitzarekin bakarrik komunikatzen; “bereziki, esaten ari garenarekiko sentitzen dugunarekin komunikatzen dugu”. Beraz, Alonsoren ustez komenigarria da ez-ahozko trebetasunak ere lantzea: haurrarengandik hurbil egotea, elkar ukitzea, begietara begiratzea, aurpegiko espresioa zaintzea…

Horrekin batera, nola ez ezik, zer kontatu ere kontuan hartu behar dela uste du; alegia, kontuan izan behar dela baliabidearen kalitatea. Horrekin lotuta, haur literatura genero desberdinak erabiltzea proposatzen du: “Egun batean album ilustratu bat, bestean ipuina, istorio bat inolako euskarririk erabili gabe, abesti bat, zeure anekdota propio bat, poesia bat…. aniztasuna, bai istorio motetan, bai kontakizunean, bai estetikan. Alde horretatik, beharra dago guraso eta irakasleen artean irizpide kritikoak garatzeko”.

Dena dela, Alonsok gomendio bat egiten du nagusiki: “Hainbat teknika daude, baina nik beti esaten diet gurasoei; ‘badakizue nola kontatu behar duzuen ipuina? Bihotzarekin’. Orduan munduko ipuin kontalari onenak izango zarete”.

Artikulu osoa irakurtzeko 2015. urtean HIK HASi aldizkarian argitaratutako Ipuinak, lotura sendotzeko tresna artikulura jo dezakezue