Umea hezkuntza prozesuaren erdigunean kokatzeak beste alderdi batzuetan aldaketak egiteko beharra agerian jarri du. Bistan da umea ikusteko modu berriak helduaren esku-hartze berriak eskatzen dituela. Esan daiteke, ordea, helduaren rolean nahasmenak sortu direla, ikaskuntza-irakaskuntza prozesuaren ardatz izatetik, ia-ia desagertzeko zorian egotera pasa delarik.

Alabaina, haurraren ongizatea ziurtatu eta garapen osoa bultzatzeko ezinbestekoa da, helduak, estrukturatutako testuingurua eraikitzea; aberatsa eta arauak zein mugak ongi definituak dituen testuingurua prestatzea, alegia.

“Helduaren rola: ez dago haurraren garapenik heldurik gabe” hitzaldia egitekoa zuen Azkoitian Alvaro Beñaranek. Egoera ikusita, eta hitzaldia atzeratuko dela kontuan hartuta, egoera honetan helduek izan beharko luketen jokaeren inguruan hitz egin dugu Beñaranekin.

Alvaro Beñaran, psikomotrizista eta pedagogoa

Nola jokatu behar dugu helduok egoera honetan?

Adinaren arabera ezberdin jokatu behar da, baina egoera berezia dela azaldu behar zaie, gauza ezberdinak egin behar direla. Gurasoek argi izan behar dute ezin garela umearen kapritxopean jarri, gurasoak erabakiak hartu behar ditu eta nahiz eta haurra hasarretu, helduok dakigunaren arabera jokatu behar dugu. Hori bai, umeak lagundu behar ditugu, egoera arraro honetan egoerak sortu behar ditugu, haurrak modu egokian egoteko. Arduratsuak izan behar gara, eta jasotako informazioarekin ahal ditugun erabaki onenak hartu behar ditugu, eta haurrek erabakitzen duguna sendo eta argi dugula ikusi behar dute. Garrantzitsuena sortzaileak izatea da eta umeak ahalik eta hoberen zaintzea, errealitatea erakutsiz eta horretatik ikasiz.

Heziketan bi ardats daude: afektua eta estruktura, biak konbinatuta haurrak aurrerantz doaz!