Papova birusak sortzen du oin azpiko iltzea deritzon garatxoa. Ohiko garatxoetatik bereiztea zaila den arren, badute azalaren azpian barrurantz sartzen den punta bat eta hark ematen die izena.
Birusak gorputzaren beste puntu batzuetan ere sortzen ditu garatxoak, ohiko formakoak edo lauak izan daitezkeenak, baina oin azpikoak dira kendu beharrekoak, barrurantz hazten direlako.
Asko izerditzen dutenek aukera gehiago dute birusa hartzeko, baita igerileku zein gimnasioetan oinutsik dabiltzan kirolariek ere, hezetasunagatik. Gainera, nerbioen bukaera asko elkartzen diren guneetan sortzen bada, oin azpiko iltzeak min ere eman dezake eta posible da aldi berean bat baino gehiago izatea.
Sendatzeko gakoak
Oin azpiko iltzea detektatuz gero, podologoarengana edo dermatologoarengana joatea da egokiena. Izan ere, ez da komeni garatxoa etxean ateratzen saiatzea, zauria infektatzeko arriskuagatik.
Garatxoa erabat ezabatzeko, errotik ateratzen da, eta horrek zulo sakon bat uzten du oin azpian, beraz tratamenduaren ostean, oina ondo desinfektatzea komeni da. Zauria behar bezala ixteko, lagungarria da oinetako erosoak janztea.