COVID-19aren pandemiak hezkuntzan ere hainbat aldaketa ekarri ditu. Bat-batean, ikasleak ezin izan dira ikastetxeetara joan, herrialde gehienetan bezala itxi egin baitituzte konfinamenduaren ondorioz. Inork ez zuen espero, baina hezkuntza-erakundeek larrialdietako konponbideak bilatu behar izan dituzte, eta urrutiko irakaskuntza ez-presentzialeko ereduei esker leundu da kolpea.

Esperientzia horretatik abiatuta, Udako Euskal Unibertsitatearen (UEU) eta UOC Kataluniako Unibertsitate Irekiaren arteko lankidetzaren emaitza da aurkeztu duten liburua: Online-irakaskuntza hobetzeko dekalogoa. Pandemiak ezarritako premietatik osatutako liburua da, hain justu.

Argitaratu duten liburuaren azala.

Liburuan, online-hezkuntza hobetzeko eta etorkizuneko konfinamendu oso zein partzialetako testuinguru presentzial ez-jarraituetan kontuan hartzeko zenbait proposamen aurkezten dira.

Hauek dira bertan lantzen diren gaiak: online-hezkuntza; lankidetzazko ikaskuntza; diseinu teknopedagogikoa; e-jarduerak; feedbacka; online-ebaluazioa; jarrera digital kritikoa; irakasleen lankidetza sarean; distantzia soziala; irakaskuntza ez-presentziala.

Eta hauek dira kapituluak:

  • Online irakastea eta ikastea: distantzia soziala gaindituz.
  • Online-ikastaroen diseinua.
  • Online-ebaluaziorako gakoak.
  • Ikaskuntza aktibo baterako e-jarduerak.
  • Irakaskuntza ez-presentzialerako ezinbesteko tresna eta baliabideak.
  • Online-irakaskuntzarako funtsezko bost estrategia.
  • Konpetentziak garatzeko bitartekaritza pedagogikoa eta teknologikoa.
  • Gutxiago gehiago da: ikasteko, zuzenketa gutxiago eta feedback gehiago.
  • Ikasleengan jarrera digital kritikoak sustatzea.
  • Irakasleak eta ikasleak sarean lankidetzan.

Lehen kapitulua osorik deskarga daiteke doan webgune honetatik, eta bertatik eros daiteke baita ere.