Adingabeei debekatu egin die Txinako Gobernuak astean hiru orduz baino gehiagoz jolastea online jolasetara. Haurrek eta nerabeek ostiraletik igandera bitartean, egunean ordubetez ibili ahalko dira. Gainerako egunetan debekatuta izango dute. Zer iruditzen zaizu hartutako neurria?

Puntua aldizkariaren azken alean gai horri buruzko eztabaida piztu dute lau adituk eta segidan jaso dira profesional horien iritziak. Zuk, zer uste duzu, egokia da hartutako neurria?

Hemen lau iritziak:

Damian Madinabeitia, Gamerauntsia: “Online jokoak nerabeen emozio eta jokabideendako erronka bat dira. Enpresen kontrola baino gehiago, heldu baten gida eta laguntza bermatu beharko lirateke; berdina ikus-entzunezkoekin, liburuak barne. Kapaz al gara gurasoak zeregin horretarako?”.

Jone Zalduegi, Emoki elkartea: “Haurrek eta gazteek euren garapenerako laguntza eta komunikazioa behar dute: debekatu beharrean, garrantzitsua da bidean laguntzea eta mugak jartzea. Teknologia eta bideo jokoak erabili bai, baina inportantea da nola eta noiz egiten duten”.

Jorge Flores, Pantallas Amigas-eko zuzendaria: “Bideo jokoen erakargarritasuna hain da handia, erraza da gehiegizko erabilera egitea. Muga bat izateak neurtzeko eta lehenesteko beharra azaleratzen du. Hala ere, denboraren kantitatea ez da esperientzia kalitatea definitzeko parametro bakarra”.

Lukene Lizaso, AGIPAD elkarteko gizarte hezitzailea: “Nerabeak zenbat jolasten diren kontrolatu beharra dago, baina nork? Gobernuak, familiak… Gure errealitatea eta Txinakoa ez dira berdinak; hemen, egokiagoa litzateke publizitatea kontrolatzea edota bertan egin dezaketen gastua ikuskatzea”.