Haurrek oso gustuko dute oinutsik ibiltzea. Sarri kentzen dituzte oinetakoak nahiz eta helduok gehienetan oinetakoak ipintzera derrigortu. Behar ez dituztenean ere bai, izan ere asko dira oinez joan ez eta zapatak jantzita doazen haur txikiak.

Batzuetan ezin da, baina beste batzuetan bai. Eta jakin behar dugu haurrak oso eroso eta pozik sentitzen direla oinetakorik gabe, izan ere oinekin ere esploratzen da!

Gero eta gehiago dira gaiaren inguruan egindako ikerketa zientifikoak eta askoren ondorioa da onuragarria dela haurrak oinutsik uztea, gehienbat garapen psikomotorrerako zein neurologikorako. Mugitzea eta mugimendu horren bitartez oinek jasotzen duten estimulu sentsoriala garapen iturri dira umearentzako. Madrilgo Complutense unibertsitateko ikerlari Isabel Gentil Garciaren ikerketa lana (gazteleraz) bide horretatik doa.

Jaioberriaren oinak

Zergatik dira hain garrantzitsuak oinak? Lehenengo zortzi edo bederatzi hilabeteetan haurraren oinak sentsibilitate handikoak dira. Adituen esanetan jaioberriek eskuetan baino sentsibilitate handiagoa dute oinetan lehenengo hilabete horietan. Hala, denbora horretan oinek funtzio garrantzitsua betetzen dute: munduaren berri ematen diote haurrari. Denborarekin apurka-apurka oinek galdu egiten dute gaitasun hori.

Adin horretako haurrei oinetakoak jartzen badizkiegu informazio sentsorial handia ukatzen diegu. Nerbio-sistemaren garapenerako ere garrantzitsua da hanken mugimenduaren erreferentzia izatea. Eskuak eta oinak begiratzen eta ukitzen hasten da haurra hiru bat hilabete dituenean. Bere gorputza ezagutzen doa, eta oinetakoak ipintzen badizkiogu kalte egiten diogu prozesu horretan.

Bestela esanda ez bada hotzik edo min hartzeko arriskurik utzi umea oinutsik. Eta ez bakarrik txiki-txikiak direnean. Ume gehienak pozik ibiltzen dira oinetakorik gabe. Ez die inongo kalterik egingo, eta sasoi ezin aproposagoa dator horretarako.

Albistearen iturria hemen.

Argazkiaren iturria hemen.