Apirila hasieran egin zuten aurrestreinaldia Donostian, Principe zinematan, eta dagoeneko herri ugaritako zinematan eskaintzen ari dira Lotura Films-ek egin berri duen Orkestra lurtarra ikus-entzunezkoa.

Filma Euskadi Saria irabazi zuen Harkaitz Canoren Orkestra lurtarra liburuan oinarrituta dago, baina bestelako tratamendua egin diote musikalki eta baita istorioan ere, “garaikideago eta ganberroago” bihurtuta, egileen esanetan.

Imanol Zinkunegik eta Joseba Poncek zuzendu dute filma eta azken horrek idatzi du musika guztia; Harkaitz Canok eta Eneko Olasagastik garatu dute gidoia. Eta emaitza da, seguruenik, Lotura Films-ek orain arte egin duen lanik “txoro eta dibertigarriena”. Publiko guztiari zuzenduta dago eta 70 minutuko iraupena dauka.

Musika ardatz

Animaziozko filmean musika oso presente dago eta keinuak egiten dizkie gainera gaur egungo Euskal Herriko hainbat musikariri ere. “Bazen garaia gutaz hitz egiteko”, “azkenean, managerrak beren lekuan jartzen dituzte”, “musika taldearekin lokalaren eta errepidearen egunerokotasunean
erretratatuta sentitu naiz”. Horiek dira proiekzioaren ondoren Donostiako Principe zinemetan Orkestra Lurtarra filmaren aurkezpenean bildutako musikariek komentatutako esanetako batzuk.

“Inoiz ez nukeen pentsatuko Mikel Anestesia pantaila handi batean animatuta karakterizatuta ikustea, eta asko pozten naiz. Hori da aurrerantz goazela”, “alabari eta bioi asko gustatu zaigu, gutxitan pasatzen da hori eta itzela da”… bezalako esaldiak jaso zituzten Bartzelonako Cines Girona-ko aurrestreinaldian, rockero zaharren ahotik.

Filma ikusten izan dira musika munduko hainbat aurpegi ezagun: Fito Cabrales (Fitipaldisekoa) Bizkaitik joan zen aurrestreinaldira Fitipaldis-en bira erraldoia hasi baino lehen; Fermin Muguruzak geldialdi bat egin zuen Black Is Beltza-Ainhoa film berriaren promozio lanean Donostian izateko; Maite Arroitajauregi ´Mursego-k etenik gabeko soinu bandak konposatzeko lanak bertan behera utzi zituen goiz batez; eta Mikel Kazalis goiztiar ibili
zen filma ikusteko. Aipatzekoa da azken biak (Kazalis eta Arroitajauregi) Anarirekin batera filmean kameo bana egiten dutela animazioarekin karakterizatuta. Horiez gain, beste askok eta askok itxaron gabe ikusi nahi izan zituzten ezohiko orkestra honen abenturak, edozein musika taldek lokalean zein errepidean bizi behar izaten dituenak ezin hobeto erakusten dituenak, baina hori bai, umore tonuan.

Orkestra Lurtarra-k musika salbatuko du? Ikusi egin behar!