Nafarroako Osasunbidea zerbitzuak gailu elektronikoak eta pantailak modu egokian erabiltzeko dekalogoa kaleratu du.  Haurtzaroan eta nerabezaroan dauden neska-mutikoentzako gomendioak dira eta haien gurasoentzako. Kartelak eta liburuxkak kaleratu dituzte eta heziketa zentroetan, osasun etxeetan, guraso elkarteetan… banatzen ari dira.

Tabletak, mugikorrak, ordenagailuak, telebistak… askotariko pantailak ditugu etxean eta horietako batzuk neska-mutikoek gainean eramaten dituzte, gainera. Gaur egungo adin txikikoak natibo digitalak dira. Gailu horien bitartez harremantzen dira, dibertitzen dira, informatzen dira….

Ingurune digital horretan gidatzea da arduradunen erantzukizuna. Etxe eta ikastetxe gehienetan daude gaur egun erabilera arauak, baina teknologia gatazka iturri da askotan

10 gomendio

  1. Ordenagailuak eta kontsolak hobeto daude etxeko espazio komunetan.
  2. Sarbideak, edukiak, jolasak… erabiltzailearen adinera egokituak izan behar dira.
  3. Ezin da inor etiketatu bere baimenarik gabe. Irudiak edo informazioa partekatzeko ere baimena eskatu behar da, eta kontuan hartu behar da norekin partekatzen diren.
  4. Pantailak eta Internet helburu zehatzekin erabili behar dira, ez aspertuta gaudelako.
  5. Hitz egin erabilera desegokiak ekar ditzakeen ondorioez: ikusmen arazoak, isolamendua, sedentarismoa, arreta galtzea…
  6. Errespetatu beti lo orduak, harremanak, ikasketak eta bestelako jolasak.
  7. Zaindu norberaren pribatutasuna eta intimitatea. Datuak, informazioak eta irudiak babestu.
  8. Umeekin bizi eta ez umeentzat. Adostu gailuak zenbat denboran erabili.
  9. Proposatu bestelako aisia motak eta tartean familiarekin partekatzeko jarduerak.
  10. Hitz egin, entzun, galdetu, laguntza eskatu eta etxean ematen dugun ereduaz hausnartu.