‘Pausso’, haur eta gaztetxoekin indarkeria sexistaren prebentzioa lantzeko material berria

Haur eta gaztetxoekin indarkeria sexistaren prebentzioa lantzeko Pausso izeneko ikus-entzunezko material berria sortu du Gipuzkoako Foru Aldundiak.

6 urtetik 14 urte bitarteko gazteengan indarkeria sexistaren prebentzio goiztiarra lantzeko helburuarekin sortu dute Pausoo. Garatze-une ezberdinetara egokitzen diren lau ikus-entzunezko ezberdin gauzatu dituzte: animaziozko bideo bat 6-8 adin tarterako; bideo-joko bat 8-10 adin tarterako; bideo bat 10-12 adin tarterako; eta mugikorrarentzako aplikazioa bat 12-14 adin tarterako. Bakoitzak bere gida didaktiko berezituarekin du.

Materiala hezkuntza formaleko eta ez-formaleko hezitzaile eta hezkuntza sareentzako eskuragarri jarriko da eta dagoeneko edonorentzako eskuragarri dago www.berdintasuna.eus  webgunean.

Kalaka kooperatibak gauzatu du egitasmoa, eta Gipuzkoako Foru Aldundiak finantzatu du. Hain zuzen ere, 2020ko Aurrekontu Irekietan herritarrek lehenetsitako proiektuetako bat da. 

Pausso egitasmoak proposatzen dituen tresnak

• 6-8 urte. Animaziozko ikus-entzunezkoaren bitartez, euren gogoko marrazki bizidunak erreferentzia gisa hartuta eta Pausso elefantetxoaren laguntzarekin, adin honetako haurrek sexismoa identifikatzeko hurbilpen bat egingo dute.
• 8-10 urte. Eguneroko bizitza eta jokoetan bizi dituzten egoerak planteatzen dituen bideo-joko baten laguntzarekin, gaztetxoek sexismoa identifikatzeko baliabideak eskuratuko dituzte.
• 10-12 urte. Fikziozko ikus-entzunezko batek lagunduko die, sare sozialetan oharkabean igarotzen diren sexismoa eta indarkeria azaleratzen eta honen oinarriak identifikatzen.
• 12-14 urte. Pausso aplikazioa, Android plataforma oinarri duten mugikorretarako baliogarria eta webgunetik ere erabilgarria. App honen bitartez, modu sortzailean eta parte-hartzailean, gazteek sexismoa eta indarkeria sexista identifikatu ahalko dituzte kontsumitzen dituzten abesti, serie edo pelikuletan, talde lanean zerrenda alternatiboak osatuz.