Haurrei zer eta nola kontatu landu aurretik, horretarako espazioak sortzea ezinbestekoa dela uste du Pello Añorga idazle, ipuin kontalari eta irakasleak. Pello Añorga ikastaroa egiten ari da Aretxabaletako Haur Hezkuntzako umeen guraso zein irakasleekin. Lantzen ar dira, besteak beste, ipuinen bidez komunikatzeko espazioak nola sortu.

Captura de pantalla 2014-12-16 a las 12.13.47

Añorgaren ustez, garai batean “errazagoa” zen espazio horiek sortzea. “Negua iristean, sutondoan bildu eta edozer kontatzen zen”, dio, baina argi du gaur egun espazio hori kasu askotan “desagertu” egin dela eta telebistari, telefono mugikorrei eta “daramagun bizimodu azkarrari” jakin behar zaiela aurre egiten.

Horregatik, barne eta kanpo interferentziak alde batera utzi, eta kontatzeko eta entzuteko guneak sortzeko gakoetan jartzen du arreta Añorgak. “Lasaitasuna, patxada, intimitatea eta konfiantza behar dira”, esan du, haren ustez “isiltasunetik abiatutako hitzek oihartzun handiagoa” sor dezaketelako heldu zein haurrengan.

Gainera, idazleak azaldu duenez, konfiantza espazioan sortutako lotura afektiboa mantendu egiten da gerora ere, eta haurrek errazago komunikatuko dituzte euren arazo zein kezkak kontalariarekin (izan guraso zein irakaslea). Era berean, espazio intimo horretan, ipuinen bidez “giza esperientziaren gairik garrantzitsuenak” lantzeko aukera ere badagoela dio Añorgak.

Nola kontatu ipuin bat?

Ipuin bat kontatzea komunikazioan oinarritzen dela azpimarratu du idazleak, eta kontaketa momentuan “benetan hor egotea” eta “esaten ari garena sinestea” besterik ez dela behar azaldu du. Hortik aurrera, hainbat baliabide espresibok eta alderdi estilistikok lagun dezaketela ere onartu du. Besteak beste, haurraren izaeraren arabera ipuina egokitzea, erritmo egokia mantentzea, hizkuntzaren erabilera zaintzea, ahotsa ondo kudeatzea, mugitzea edota errimekin jolastea.

Hala ere, Añorgak funtsezkoenari ematen dio garrantzia: kontaketarako espazio egokia eta komunikaziorako konfiantza giroa sortzeari, hain zuzen.