Atekagaitz Itsasuko udalerrian dago, Lapurdin. Kondairak dio 778. urtean egin zuela pasabidea harrian Karlomagnoren iloba Errolanek. Durandal izeneko bere ezpatarekin egin zuela dio du ahoz aho jasotako kondairak.

Errobiko arroilaren hasieran dagoen harri azpiko pasabidea da Atekagaitz, eta oso bisitatua da batez ere opor sasoian. Leku fresko eta atsegina da udan eta erraz irits daiteke Itsasu herritik.

Itsasuko frontoitik abiatzea gomendatzen dugu. Autoa bertan utzi eta oinez egin behar da Elizakoparti auzorainoko bidea. Hogei bat minutuko txangoa da eta berehala iritsiko gara elizaren ondotik abiatzen den seinaleztatutako ibilbidera. Elizak ere badu aparkalekua. Beraz, gutxiago ibili nahi duenak badu bertaraino autoz joateko aukera.

Errobi ibaiaren ertzetik egingo dugu hemendik aurrera ibilbide guztia. Beste 25 bat minutu beharko ditugu Atekagaitzera iristeko. Bide erraza eta atsegina da. Familian egiteko primerakoa.

Atekagaitz igarota Laxia erreka aurkituko dugu. Errobi ibaiaren ibaiadar bat da Laxia, eta ez oso urruti ostatu batzuk ere badaude. Ur freskoa eta garbia du Laxiak, eta asko dira naturak inguru horretan egindako hondartza itxurako gunean bainu txiki bat hartzeko aukera galtzen ez dutenak.

Itzulera bide beretik egin behar da. Guztira hiru bat kilometro dira joan-etorria.

Argazkiak Gari Araolaza, Dynamosquito, Xanovsky eta Sebastien Bertrand.