Robotika eskolek gero eta arrakasta handiago dute gazteen artean

Gaur egungo gazteek tresna digital mordoa dute esku artean goizean goizetik, eta adituek diote garrantzitsua dela teknologia berrien erabiltzaile soilak ez izatea, ulertzea horien atzean zer dagoen.  Teknologiarekin lotutako ekintzek gero eta arrakasta handiagoa dute gazteen artean eta gero eta gehiago dira seme-alabak gaitasun teknologikoetan trebatzea nahi duten gurasoak. Hala, ugaritzen doa eskaintza.

Rockbotic ekimeneko Gipuzkoako koordinatzailea da Amaia Bastida azkoitiarra. 4-17 urte bitarteko neska-mutikoentzako robotika tailerrak eskaintzen dituzte, eta martxan dituzte Gipuzkoako 14 ikastetxetan: Bergaran, Oñatin, Arrasaten, Errenterian, Donostian, Irunen edo Azpeitian. “Hiru adin tarte bereizten ditugu: 4-5 urte, 6-12 urte, eta 12-17 urte. Hala ere, nork bere trebetasunaren arabera egiten du aurrera. Robotika lantzen dugu, baina hasierako urteetan baliatzen dugu robotika bestelako gaiak lantzeko: emozioak, eskura ditugun gailuen erabilera egokia, nola joan diren sortzen gailu ezberdinak… Programazioa, robotika edo bideo jokoen diseinua Bigarren Hezkuntzako taldeetan lantzen dugu, gehienbat”.

Bastidak argi dauka gaur egungo gazteek gailu digitalekin lotutako oinarrizko trebetasunak barneratuta dituztela. “Oso txikiak izanagatik hartzen dute mugikor bat, esaterako, eta berehala topatzen dute argazki kamara, bideo kamara, argitzen dute pantaila… Azkar hartzen dituzte, gainera, trebetasun horiek. Lengoaia horretara oso irekita daude, gu adin horretan baino askoz ere gehiago”.

Bastidak adierazi du Lego pieza arruntak erabiltzen dituztela robotika lantzeko. Umeek —nagusienek— autoak, hegazkinak… sortzen dituzte, eta aginduak ematen dizkiete programazioaren bitartez.

Gidaritzarekin

Bastidak uste du teknologia berrietan trebatzea garrantzitsua dela, baina gidaritza batekin beti ere. “Gazte asko dago teknologia berrietan oso trebea dena. Egia esan orain gutxi arte aukera oso gutxi zegoen haurtzaroan zaletasun hori lantzeko. Gure metodoa, rockbotic, Madrilgo guraso batek jarri du martxan 2012an. Seme-alaben interesak ikusi eta ez zuen aurkitu nola bide eman, eta berak sortu da. Esan beharra dago ingeniaria dela”, azaltzen du Bastidak. “Helburua da etorkizunerako beharrezkoak izango dituzten zenbait erreminta eskuratzea: programazioaren lengoaia, esatera. Lehen Hezkuntzan Scratch, Arduino eta 3D diseinua lantzen dituzte. Hamabi urtetik aurrera App-ak ere ikusten dituzte. “Elektronikako plaka batekin mila gauza egin daitezke. Programazioaren bidez ikasle batzuk lortzen dute gelako kaxoi bat bakarrik irekitzea eta ixtea, esaterako”.

Gaiarekin lotuta aurretik Guraso.eus atarian landutako edukia hemen.

Argazkiak Rockbotik.