Emaizeko sexologoa izateaz gain, www.guraso.eus egitasmoko kolaboratzailea da Maider Garcia de Vicuña eta Puntua aldizkarian idatzi duen azken artikuluan sexting-a izan du berbagai.

Duela aste batzuk, Euskal Herriko Unibertsitateak egindako ikerketa baten ondorioak publiko egin ziren. Ikerketak ondorioztatu du sexting-a egiten duten nerabeek edo maitasun erromantikoaren mitoak barneratuen dituztenek probabilitate handiagoa dutela bikote ziberabusua egiteko edo jasateko.

Jazarpenak modu ezberdinak izan ditu garai bakoitzean, eta sare sozialen sorrerarekin batera jazarpenerako bide berriak bilatu dira, baita harreman sentimentaletan ere, eta, ikerketek diotenez, hori mundu osoan gertatzen ari den fenomenoa da.

Gozatzeko beste modu bat

Bide digitalen bidez eduki erotikoak bidaltzean datza sexting-a. Hori egitearen helburua kitzikapena izaten da. Maiz, bikotekidearen berotzea bilatuko da, baina, aldi berean, berotze pertsonala sor dezake, besteak sentituko edota egingo duena pentsatzeak piztu ahal gaituelako.

Sexting egitea gozatzeko beste modu bat izan daiteke, eta, bestelako harreman erotikoek dituzten zenbait arrisku ez dituen arren, hala nola infekzioak edota planeatu gabeko haurdunaldiak, badu eduki erotiko hori zabaltzeko arriskua, eta ezin dugu hori ahaztu; beraz, arriskuak ekiditeko neurriak hartu behar dira. Konpromiso nagusia pertsonala da. Pertsona batekin gozamena partekatzen dugunean, gure arteko zerbait da, gure intimitatea. Berdin du intimitate hori gorputzak ukituz edo gorputzak ikusiz den. Bestetik, egitekotan, berezkoak diren seinale pertsonalak ez ditugu erakutsi behar –aurpegia, tatuajeak, jaiotza-markak…–, gomendagarria da zenbait filtro erabiltzea eta, noski, irudi horiek txoko neutro batean ateratzea, ezaguna ez dena.

Generoaren araberako rolak

Historikoki gertatu izan da, ordea, bikote bat apurtzean, batez ere, batek hartzen duenean erabaki hori, bestea minduta sentitzea. Eta min hori ateratzeko, bide okerrak hartzen dira askotan; bestearen kontra egiteko bideak, hain zuzen. Gainera, emakumeon sexualitatea historikoki gure kontrako arma gisa erabilia izan da. Maitatuak edo gustukoak izatean, gure desioa, kitzikapena eta plazera baloratua da, baina, harremana apurtutakoan, hori bera mintzeko erabili ohi da.

Nerabeek sexting-praktiketan generoaren arabera dituzten rolak ere aztertu ditu ikerketak, eta emaitzek erakusten dute mutilek gehiago egiten dutela sexting pasiboa; alegia, ohikoagoa da haiek eduki sexuala eskatzea eta jasotzea, eta neskek sortzea eta bidaltzea. Horrek ere historikoki jasotako mezuari erantzuten dio, zeinean gizonezkoak desiratzaile diren eta emakumezkoak desiratuak; beraz, askok besteen desioa pizteko egiten dute, euren desio propiotik jaiotzen den aintzat hartu gabe, euretaz espero den hori betetzeko nolabaiteko beharraz.

Ziberindarkeria

Ikerketak maitasun erromantikoaren gaineko azterketa ere egin du, eta ezberdintasun esanguratsuak azaleratu ditu sexuen arabera. Maitasun erromantikoaren ideia nagusietako batzuk hauek dira: “Jelosia maitasunaren seinale da”, “maitasuna eta abusua bateragarriak dira” eta “maitasunak edozer gainditu dezake”, adibidez. Emaitzek erakutsi dute mutilek gehiago onartzen dituztela maitasun erromantikoaren mitoak, eta barneratuago dituztela; eta, ikerketaren arabera, sinesmen horiek eragina dute bikoteko ziberabusuan. Zenbat eta gehiago sinetsi maitasun erromantikoaren mitoak, orduan eta handiagoa izango da bikoteko ziberindarkeria nahasteko aukera. Sinesmen horiek eta baita ziberjazarpena ere edozein bikotetan gerta daitezke, baina neska-mutilez osatutako bikoteengan arruntagoak dira, genero-estereotipoen indarragatik. Esan bezala, indarkeriak bide berriak baliatu ditu, eta, kasu askotan, ideia pozoitsu horietan oinarritutako indarkeria fisikoa edota psikologikoa arlo analogikoan gertatzen bada, hori arlo digitalera zabaltzen da erraz.

Ikerketako datuak

Ikerketaren autoreen iritziz: “Emaitzek nabarmentzen dute zeinen garrantzitsua den prebentzio programetan mito horien analisia txertatzea, nerabeek uler dezaten nola eragiten duten euren harreman intimoetan. Uste dute komeni dela, orobat, harremanetan abusuzko edozein jokabide identifikatzeko estrategiak lantzea, hala offline nola online, jardun birtualen berezitasunak aintzat hartuta. Haien ustez, gainera, inportantea da nerabeek Internet segurtasunez erabiltzen ikas dezaten indar egitea. Prebentzio-programa horiek oso txikitatik aplikatzea gomendatzen dute, lehen harreman sentimentalak gero eta goizago izaten direlako eta geroko harremanetarako oinarriak ezartzen dituztelako”.

Ikerketaren datuek agerian uzten dute sexuen heziketa integrala ezinbestekoa dela, horrek emango baitie umeei eta gazteei jazarpenaren aurrean beharrezko tresnak: gorputz eta desioen ezagutza, nahi eta muga pertsonalak, aniztasunarekiko errespetua, maitasun erromantikoaren sinesmen okerrak, emozioen kudeaketa, harreman positiboen alderdiak, auto- zaintza eta besteekiko zaintza, adostasuna, enpatia…

Sexu heziketak prebentzioa egiten du, baina, arriskuetan soilik oinarritu ordez, sexualitatearen alde positiboak landuz lortzen ditu ongizatea eta prebentziorako baliabideak.