1975ean itxitako Debako trenaren burdinbidearen trazatua egiten du 7,9 kilometro dituen bide zati honek. Erosoa, lasaia eta ondo zaindua da. Deba ibaiaren kontran doa eta nahi izanez gero Antzuolarainoko bidea ere egin daiteke. Kasu honetan, distantzia 21,1 kilometrokoa da.

Joan etorria egitea da proposatzen duguna, eta Soraluzetik abiatuta Bergara ikusi eta herriak dituen askotariko jolas-parkeetan edo berdeguneetan gozatzeko.

Soraluzeko Alejandro Calonje Etxetaldea kaletik abiatzen da bide berdea. Zentzu bakarreko norabidea du zirkulazioak kale horretan eta ezkerretara gelditzen da bide berderako sarrera.

Asfaltozko zorua izango dugu bide guztian zehar eta oinez, bizikletan zein patinetan egiteko modukoa. Irisgarritasun premia bereziekin ere egoki egin daiteke.

Bidea hasi eta azkar bizikletak garbitzeko gunea eta adinekoentzako gimnasia parkea aurkituko ditugu. Seinaleztatutako bidea da eta Mekolalde aldera egingo dugu guk.

Bergarako Osintxu auzora iritsiko gara lehenengo. Leku ederra da atsedena hartzeko. Zubia gurutzatu eta ezkerrera auzoko plaza aurkitzen da non erabilera irekiko frontoia, jolas-parkea, eta pare bat taberna dauden.

Zubia gurutzatu beharko dugu bide berdera itzultzeko eta Osintxutik aurrera eginda Bergarara iritsiko gara. Abiatu aurretik bide berdearen albo batean dagoen iturrian bete ditzakegu kantinplorak. Bidean oiloak, astoak, behiak… ikusiko ditugu inguruan baserri ugari baitaude. Mekolaldeko industria gunearen atzeko aldetik igarotzen da bidea.

Inguru berdea eta ondo zaindua da. Ibaia ere lasai doa Deba aldean itsasoratzeko.

Eserlekuak, itzala, zaborrontziak… horiek ere ez dira falta eta laster batean helduko gara Bergarako Murinondo auzora. Bertatik bertara dago jada Bergara.

Bergaran askotariko aukerak daude. Jolaserako Usondo/Oxirondo parkea erdigunean, eta Labegaraietako jolasgunea proposatzen ditugu, baina beste asko daude. Bestelako bisitak ere egin daitezke Bergaran balio handiko eraikinak eta inguruneak daudelako. Laboratorium museoan dago turismo bulegoa.

Bidegorria jarraituta iritsiko zarete bietara. Ondo seinaleztatuta dago eta segurua da.

Soraluzera itzultzeko bide berdina egin daiteke. Bestela, autobus zerbitzua kontsultatu daiteke.