Eskolako gurasoak eta erretiratutako irakasleak arituko dira, besteak beste, boluntario lanetan.
Matematika saioetan metodologia berritzailea erabiliko dute aurrerantzean Otxandioko eskolan. Komunitateko boluntarioen laguntzaz, talde elkarreragileak osatuko dituzte geletan, eta saioek dirauten artean, haurrek lauko taldetan egingo dute lan, boluntario banarekin eta tutorearen laguntzaz. Eskolako gurasoak eta jubilatutako irakasleak arituko dira, besteak beste, boluntario lanetan. Batzuentzat jardun eremu berria denez, formazio bilerak egin dituzte geletara sartu aurretik.
Saioetako dinamikan, bakoitzak gelako txoko baten eta gai baten ardura hartuko ditu, eta ikasleak izango dira errotatuz joango direnak. Horrela, mahai batean geometria landuko dute, beste batean logika eta horrela jarraituko dute gai guztiak landu arte. Cilaurrenek aitortu du “koordinazio eta antolaketa lan handia” izan dela, baina aurreko esperientziako emaitzak kontuan hartuta, merezi izan duela. Dena den, gai guztiak ez dira metodologia horren arabera lantzeko modukoak, taldeka ebazteko ariketak izan behar baitira ardatza. Hortaz, metodologien eta ariketen zailtasunaren arteko oreka bilatu behar izan dute
Ekimena martitzenean jarriko dute martxan ofizialki, baina joan den ikasturte amaieran egin zuten lehen saiakera, hirugarren hiruhilekoan. Orduan, baina, ez zuten urteko plangintzan sartu ez zutelako aurreikusten dagoeneko metodologia berria txertatzeko moduan izango zirenik, kontatu du Cilaurrenek. Edonola ere, esperientziaren balorazioa “oso ona” izan zen, eta emaitzekin “oso pozik” daude eskolan.
Ekimena zabaltzeko asmoa
Cilaurrenek azaldu duenez, talde elkarreragileen metodologia beste arlo batzuetan ere aplikatzeko asmoa dute, eta hizkuntzen lanketarekin hastea gustatuko litzaieke, euskararekin eta ingelesarekin.
Ekimena zabaltzeko, ordea, “baliabideak lortzea zaila” dela esan du Cilaurrenek, eta batez ere, boluntarioen araberakoa izango dela. Izan ere, ez da erraza eskola ordutegi barruan libre dauden herritarrak topatzea
Horregatik, eskolak dei egin die herritarrei, ekimenean parte hartu dezaten, ikasketa buruaren arabera, “eskolari eta haren jardunari beste begi batzuez begiratzeko aukera” emateaz gain, pertsonalki ere “oso esperientzia aberasgarria” baita.
Argazkiaren iturria hemen.