Txatxilipurdi elkartetik talde jolas ezberdinak proposatuko dizkizuegu, haurrekin helduekin edo edozein taldetan jolasteko modukoak.



Azalpena

Guk garbigailu deitzen diogun arren zuek asmatu zuen izen propioa.
Jolas honetan partaide guztiak borobilean jarriko dira bat izan ezik, hau borobil erdian sartuko da. (partaide kopurua handia bada bi edo hiru ere gelditu daitezke borobil erdian) Erdian daudenen helburua, borobilean sartzea izango da. Honetarako borobileko partaide baten aurrean jarri eta aurrez talde guztiaren artean adostutako irudi bat egiteko esango dio.


Borobileko kideak eta bere ondokoek adostutako irudia egiten badute berak jarraituko du erdian, beste norbaiti beste irudi bat egiteko aginduz, norbaitek huts egin arte. Huts egiten duenak bere lekua utziko dio erdikoari eta bera sartuko da borobil erdian.


Irudiak: Jolasten hasi aurretik partaide guztion artean irudi ezberdinak adostu beharko dira. irudietan, beti hiru pertsonek parte hartu beharko dute, erdikoa eta bere ezker eskuin daudenak. Irudimena erabiliz nahi beste irudi asma ditzakegu.


Hona hemen Txatxilipurdiko lan taldean erabilitako batzuk.


Elefantea: Erdikoak tronpa irudikatu beharko du albokoek aldiz belarriak.


Tostadora: Erdikoa tostada izango da, salto egingo du eskuak gorputzari itsatsita, bere aldamenekoek tostadora irudikatuko dute eskuak elkartuz.


Enborra moztu: Erdikoa enborra izango da albokoek zerratu egin beharko dute.


Garbigailua: Erdikoak bueltak eman beharko ditu, albokoek aldiz garbigailua irudikatu beharko dute.