Haurren ingurua eta “unibertsoa” euskaldunagoa egiteko asmoarekin, Eusfera ekimena aurkeztu du Taupa mugimenduak. Familiei zuzenduta dago eta askotariko baliabide eta tresnak eskainiko ditu euskaraz “gozatu” eta familiendako elkarguneak sortzeko. Honenbestez, haur eta gazteen atmosferan euskararen presentzia handitzea du helburu Eusferak. “Aurrerapausoak ematen jarraitu nahi dugu aisialdia, kultur kontsumoa, erreferenteak, kirola, etxeko hizkuntza praktikak… euskaldunagoak izan daitezen” azaldu du Taupa mugimenduak.

12 urtera arteko haur guztiei dago zuzenduta ekimena eta ez dago euskara jakin beharrik parte hartzeko; haurren ingurua euskaldunagoa izatea gura duten guraso guztiek parte hartu dezakete bertan.

Maiatzaren 7tik 17ra gauzatuko da ekimena, antolatzea erabakitzen duten herrietan. Parte hartuko duten herrien zerrenda eta informazio guztia, Eusferaren webgunean jarriko dute aurrerago ikusgai.