Duela egun batzuk, Texasko Trevor Wilkinson 17 urteko gaztea institututik bota zuten azazkalak margotuta eramatearren. Zehazki institutuak argudiatu du eskolako janzkera kodea urratzen duela horrek. Wilkinsonek sare sozialetan salatu du gertatutakoa: “Pentsa zuen eskolak ez diela haurrei azazalak margotzen uzten…”.

Gertatutakoa homofobikoa eta sexista dela-eta, gazteak sinadura bilketa bat abiatu du Change.org-en. 35.000 sinadura baino gehiago zituen jada, asteburua hasi aurretik.

Clyde High School institutuak ere eman du bere iritzia eta azpimarratu du kodeak dioenaren arabera, institutuan gizonek “debekatuta” dutela makillajea eta azazkaletako esmaltea erabiltzea. Halere, gehitu dute ikasleak aukera izango duela “arazoa eskolan zuzentzeko”.

Nolanahi ere, Wilkinsonek janzkeraren kodea “diskriminatzailea” dela berretsi du: “Benetan tamalgarria da niretzat, 2020an gaudela sentitzen dudalako eta aurrera egin beharko genukeelako”.

Nerabeak eskolako zuzendariarekin eta zuzendariordearekin bilera izan du eta azaldu duenez, azazkaletako esmaltea kendu ezean, bere jarduna esekita geratuko dela ohartarazi diote. Wilkinsonek, ordea, argi du: ez du atzera egingo.

Hona etorrita, ez da denbora asko igaro Euskal Herriko dozenaka ikaslek Bilboko gazte bati babesa helarazi ziotenetik. Ez da egoera bera, eta ikastetxeen jarrera ere ez, jakina. Kasu hartan, Mikel gazte bilbotarra gona jantzita joan zen eskolara, eta ikasgelan zegoela, ikastetxeko psikologoak “laguntza” eskaini nahi izan zion. Hain zuzen ere, hori bera salatu zuen gazteak; berak ez zuela laguntzarik behar, baizik eta mutilek gona eramatea “normaltzat hartzea”.

Bi kasuek –zentroen intentzioetatik harago– argi utzi dute gazteen erantzuna oso indartsua dela sexismoaren aurka egiterako orduan, eta arazoa sistematikoa dela; ez direla kasu isolatuak.