2019. urtean hil da Tomi Ungerer,  haurrentzako liburuen egile eta ilustratzaile nabarmenetako bat. Maurice Sendak,  Arnold Lobel,  Shel Silverstein bezalako egileekin batera  haurrentzako liburu ilustratuen munduan bide bat ireki  duen belaunaldikoa dela esan dezakegu. 2019. urtean argitaratu da euskaraz bere azken lanetako bat, “lagun berriak”.

Berriz ere pamiela-kalndraka argitaletxeak izan dira liburua euskara ekarri dutenak. Urte batzuetako geldialdia eta gero argitaratu zuen 1998. urtean Tomi Ungererek libu hau. Adiskidetasuna, bizitzako erronkei aurre egiteko moduak, sortzailetasuna, harremanak, aniztasuna …   Imanol Mercerok egin zuen liburuaren kritika berrian.

Bizitzea da arterik gordinena

Badira sorkuntza batzuk, sinpleena kontatuta ere, sakontasun mugaezina erakusten dutenak. Kontraesana dirudi sinpletasunak sakontasuna ekar lezakeela baieztatzeak, baina halaxe da: egiarik borobilenak oinarrizko ekintzen behaketan aurkitzen ditugu.

Album ilustratu honetan adiskidetasun istorio bat kontatzen zaigu, nola eta zergatik hasten den Rafi eta Ki-ren arteko adiskidetasuna, nola garatzen eta denboran luzatzen den, mugagabeki.

Eta kontaketa xume honek aurrera egin dezan testuinguru bat erakusten zaigu, aurreiritzi eta oztopo sozialez betetako gizarte batena, kemenez eta onginahiez gainditu beharrekoa. Erakusten zaigu itxurakeria eta jatortasuna txanpon beraren bi aldeak direla, bakoitzak erabakitzen duela zein modutan ekin bizitzari. Laburki esanda, Lagun berriak albumak zera erakusten du: bizitzan dauden oztopoak ezagutu eta gainditzeko giltzarriak zeintzuk diren.

Testua eraginkorra da, baina ilustrazio lanak goia jotzen du. Ilustrazioak eragin handia dauka istorio honen osaketan, kontatzen, tonua ezartzen (itxaropena, kemena…) eta arte gordinaren ikastaro azkar-eskergarria ematen.

Imanol Mercero