Toti Martinez de Lezea: “Irakurtzea garrantzitsua da, hizkuntza lantzen da eta hizkuntza ezinbestekoa da munduan ibiltzeko”

Idazle ezaguna eta emankorra da Toti Martinez de Lezea. Enda Lur da argitaratu berri duen eleberria. Helduendako lana da, baina baditu haurrentzako egindako hainbat lan (Bazen behin saileko ipuinak, Nur bilduma…). Irakurzaletasunari buruz galdetu diogu.

. Zure lanek harrera oso ona izan ohi dute gaztetxoen artean. Zergatik ote?

Bai. Ilobarentzako idatzi nuen Nur bildumako lehen eleberria, eta azkenean hamar argitaratu ditut. Bazen Behin saileko ipuinek ere harrera ona izan dute. Gehiago dira umeei kontatzeko ipuinak.

Gaztetxoentzako ere baditut hiru eleberri, eta gehiago eskatzen ari dira. Baina adin batetik aurrera uste dut badagoela literaturaz betetako mundu handi-handi bat.

Uste dut gustukoa eskainiz gero gazteek irakurtzen dutela.

. Zergatik da garrantzitsua irakurtzea?

Hizkuntza lantzen delako. Ikusten dut gaztetxoek gramatika akats handiak ikusten dituztela Facebook edo Interneteko bestelako sare sozialetan.  Ondo hitz egitea oso garrantzitsua da bizitzan. Oso garrantzitsua: lan bat aurkitzeko, harremanak edukitzeko… eta orokorrean munduan ibiltzeko. Zer nahi hizkuntza dela. Eta hori nola lortzen da? Irakurtzen.

. Irakurle amorratua zinen umetan.

Irakurtzea plazer handi-handia izan da eta da niretzat. Noski, gurasoak ere irakurleak ziren. Eta 15 urtera arte ez zegoen telebistarik gure etxean… Orduan, zer egiten genuen? Irakurri. Zentzu horretan, gauza aldatu egin dira.

. Gurasoak irakurleak zirela diozu. Garrantzitsua da hori?

Neurri handi batean, bai. Haurrek ez badituzte gurasoak irakurtzen ikusten nekez hartuko dute zaletasun hori. Gertatzen da, baina… Eskolan ere garrantzitsua da irakurketara animatzea. Askotan derrigortuta egiten den ariketa bat da. Asmatu beharko genuke ariketa erakargarri bihurtzen: aukeratutako irakurgaiekin, lotutako bestelako ariketekin…