Nerea Martija Apraiz Marti idazleak eta Nahia Iglesias Pamparacuatro
Marrabilla ilustratzaileak, haien lehenengo liburua argitaratu dute: Ttipi Ttapa du izena eta hiru urtetik gorako haurrei zuzendutakoa da.

Nerea Martija Apraizek, Pedagogia eta Magisteritzako Lehen Hezkuntza ikasi zituen. Santanderren Hezkuntza Emozionala, Soziala eta Sormena Graduondoa ere egin zuen. Bihurrikerien eta sorpresen munduan murgildu zen lehen aldiz 2013an, bere auzoko, Santutxuko, plazan pailazo bezala jardunda. Esperientzia horrekin liluraturik, gutxira Sudurkeriak eta Puski eta Txurruski taldeetako kide bilakatu zen. Hortik aurrera, umorez eta bizipenez bete du bere motxila. Ttipi Ttapa da argitaratzen duen lehenengo liburua. Txikitatik ameslari, aspalditik da irakasle eta ipuin kontalari.

Bestetik, Nahia Iglesias Pamparacuatrok, Arkitektura teknikoan egin zituen ikasketak, plano eta kalkuluak pintzel eta akuarelekin partekatuz. 2016ko udazkenean bidaiari ekin zion amerikar kontinentetik eta horrela jaio zen Marrabilla proiektua; bidaian, marraren bila, Marrabilla. Bideko pertsona, txoko eta momentuen ilustrazioez betetzen doa motxila; kolorez eta bizipozez betetzen. Teknikari dagokionean akuarela nagusitzen da Marrabilla-ren lanetan, tinta, grafitoa, koloretako arkatzak… eta beste teknika batzuez konbinatuz.

Liburuaren sortzaileak.

2021.urtean elkarrekin bide bat zabaltzeari ekin zioten sortzaileek, eta bion esperientziak eta grinak elkartuta sortu dute Ttipi Ttapa.