Txangoa familian: Ola – Aitzondo urjauzia (Irun – Gipuzkoa)

Aiako Harria Natur parkean 4,96 kilometroko ibilbidea. Erraza oinez egiteko. Bidean labeak eta bukaeran urjauzia ikusiko ditugu.

Abiapuntua Irungo Meaka auzoan dagoen Ola sagardotegia da. Eraikina bera XIII. mendeko ola da, konpondu eta sagardotegi bihurtu dutena. Ondoan duen zubian aurkituko dugu lehen seinalea, zuri-berdea (SL-GI 1006). Pista zementuzkoa da eta Belbio zein Belbioberri baserrietaraino eramango gaitu. Gero, belarrezko pista jarraitu behar dugu eta urjauzia seinalatzen duen zutabe bateraino eramango gaitu. Aurrera eginez, tunel batera iritsiko gara. Bertan aurkituko ditugu, baita ere Karburoko Etxea izandakoaren aztarnak. Aztarna horien barruan sartuko gara eta pista jarraitu egingo dugu. Aitzondo urjauzia aztarna horietatik gertu dago, baina ikusteko beharrezkoa da errekatxoa zeharkatzea. Beste aldera iritsi ostean gora doan bidexka bat jarraitu behar da. Urjauziaren beheko aldera eramango gaitu.