San Adriango tunela edo Sandratiko tunela leku esanguratsua da Euskal Herrian. Lizarretako pausoa izenarekin ere ezagutua txango polita da neska-mutikoekin egiteko.

Proposatzen dugu Zegamako Otzaurteko gainetik 5,1 kilometrora dagoen Aldaolako aparkalekutik abiatzea. Aizkorri-Aratz parke naturalean kokatuta dagoen puntua da eta informazio panelak aurkituko dituzue ibilaldia norantz den argitzeko. Bideak ez du galbiderik bakarra da-eta. Laster, gainera, errege galtzadaren arrastoak agertuko dira eta jarraitu besterik ez duzue.

Mendeetan zehar erregeek, erromesek, soldaduek eta merkatariek erabili izan dute galtzada hori. Haur txikiekin joanda —4 bat urte— ordubete pasa beharko duzue San Adriango tunelera iristeko. 55 metroko haitzuloa da eta 1000 metroko garaieran dago kokatuta.

Pasabideak Oñatira eramango gaitu, Urbiatik eta Arantzazutik pasata. Haur txikiekin joanda proposatzen dugu etorritako bide beretik egitea itzulia. Hau da, Zegamara itzultzea.

Bide erraza da eta gomendatzen dugu tunelean jolasean egiteko esku-argia edo kopetako-argia eramateko. Tunelak sarrera zabala du eta indusketak lanak egiten aurki ditzakezue bertan. Aurrera egin ahala, ordea, estutu eta txikitu egiten da pasabidea. Diote pasabide horretan burua makurtu behar izan zuela Espainiako Errege Karlos I.ak.