Txangoa familian: San Adriango begiratokia
Zegamatik abiatuta ezagutu Gipuzkoako historian giltzarri izan den San Adriango koba (Sandrati) ospetsua. Pare bat ordu beharko ditugu lau kilometroko ibilbidea egiteko. Desnibela 367 metro da.
Esan moduan, Zegamatik abiatuko gara, eta nahi izanez gero bertan dagoen Aizkorri-Aratzeko interpretazio zentroa bisita dezakegu.
Erdi Aroan, Europa eta Gaztela lotzen zituen errege-bide nagusiko pasabidea zen eta ospetsu askoren izkribuetan aipamen berezia jaso zuen pasabidea da honakoa.
Aldaolako aparkalekua da abiapuntua, Otzaurteko gainetik 5,1 km.ra. Bideari ekiteaz bat, ur-kanala zeharkatuko duzu eta mendian gora jarraituz Mikelete-etxera iritsiko zara. Pare parean izango dituzu San Adriango haitzulo famatua eta Aratz zein Aizkorriko harkaiztiak.
Aurrerago errege, erromes, bidelapur, gerlari, merkatari zein bidaiariek erabili zuten errege-bide historikoarekin egingo duzu topo.
Honi jarraituz, kobaren atarira iritsiko zara eta bertan, aspaldiko garai haietan koban egon ziren eraikuntzen aztarnak topatuko dituzu. Koba zeharkatu, harlauza handiz atondutako errege-bidetik atera eta marka zuri-berdei jarraituz, pagadian murgilduko zara. Jarrai iezaiozu bidexkari, San Adriango balkoira bideratuko zaitu eta goza ezazu bertako ikuspegi bikainaz!
Ondoren, igotako bide beretik itzuliko zara hasiera puntura.