Txikitik handira: Nire etxetik mundura.

Gaurkoan Porrotxek helduokin solasean aritzean errepikatzen duen ideia bat ekarri nahi dut gurera (zure baimenarekin Joxe Mari): txikitik handira.

Ezkututik kalera, isiltasunetik gizartera, diskriminaziotik justiziara.
Hezkuntza, hezkidetza, feminismoa, berdintasuna…hitz potoloak dira, handiak. Hauek oinarri dituen jendartea lortu nahi dugu eta horri ekiteko bide ezberdinak jarrai daitezke. Epe luzerako helburu hau lortzearren bide eraginkorrena bilatu beharko genuke, errazena eta motzena izango ez bada ere.

Hezkidetzaz aritu gaitezke profesionalen arteko kongresutan, handitan, baina txikitan aritu beharko gara jostailuak erostean mutil zein neskei aukera berdinak eskeiniz. Berdintasuna, handitan, aldarrikatu dezakegu martxoak 8an, baina kirol froga batean neska saridunei 2 musu eta mutilei eskua emateari utzi beharko diogu, txikitan. Gurasotasun parekideaz idatz dezakegu, baina nork aldatuko dio umeari fardela emakumezkoen komunetan besterik ez badugu aukera?

Garrantzi gutxikoak bezala ikusten ditugun detaile txiki hauek dira gure jendartearen oinarriak jartzen dituztenak. Handitan pentsatzen dugunean txikiari ez diogu dagokion garrantzirik ematen.
Umeekin hitz potolo hauen esanahiaz eta garrantziaz aritu gaitezke eta bakoitzaren gaitasunen araberako hizkera erabiliz gero, ulertuko dituzte. Horrek ordea ez du esan nahiko bere bizitzan aplikatzeko gai izango direnik. Handia txikira eramatea ez da erraza izaten, ezta helduontzat ere.
Etxeko lanak eta ardurak senitartekoen artean banatu behar ditugula argi dugu eta gai izango ginen edonor konbenzitzeko hamaika argudio ematen, baina gure etxean erraza izan da banaketa hori? Eta banaketa parekoa delaz ziur gara? Ez dakit zuek, baina nik biei ezetzarekin erantzungo nieke.

Egoera aldatzeko bi bide ditut, etxekoekin parekidetasunaz, berdintasunaz eta justiziaz aritu edo etxean ditugun lanak elkarrekin zerrendatu eta bakoitzaren gaitasun eta aukeren arabera banaketa egin guztiok justua delaren ziurtasuna izan arte. Lehenego aukerak ordu laurden, ordu erdi edo bi arratsalde eramango dizkit, esfortsu txikia handitan arituz munduko eraldaketa lortzeko. Bigarrenak familia elkartzera, elkarlanean ordu batzuk ematera, adostasunak bilatzera, noizehan behin erabakia birpentsatzera eta moldatzera eramango gaitu. Bide luzea eta neketsuago, txiki asko behar ditugulako handia lortzeko.

Eta oraindik lan gehiago eta etekin hobea ekarriko digun hirugarren bidea jarraitzerik dago: txikitan aritu eta hitz potoloekin uztartu zentzua emanez. Biak bateragarriak, biak ezinbestekoak.
Erreferente teorikoak beharrezkoak ditugu gaurko egoerara nola iritsi garen jakiteko, gure errealitatea ulertzeko eta noruntz jo erabakitzeko. Aldi berean gauza txikietan emandako aldaketak ikusita gure mundua eta errealitatea nola joan den eraldatuz ulertuko dugu eta eraldaketa gure esku dagoelaz ohartzeko baliagarria izango zaigu.
Hitz handien artean bizi ahal izateko pausu txiki asko eman dituzte gure aurrekoek eta milaka pausu eman beharko ditugu guk, beti ere bide motzagoa uzteko gure ondorengoei.

Gurasook gure seme-alabak handitan bizitzea nahi dugu, beraz ekingo diogu txikiari. Uste baino errazago eta askoz ere eraginkorrago!

Entzun Maider Garcia De Vicuñarekin izandako elkarrizketa.