Maider Garcia de Vicuña

Maider García de Vicuña naiz, ikasketaz Psikologo eta Sexologoa.
Hainbat Maider ditut barnean, sexologoa, bi semeen ama, irakurzale, bidaiari, feminista, musikari…eta beste hamaika, unean uneko gogo eta baldintzen arabera azalarazten direnak, beraien artean nahasirik maiz.
2002tik Sexologiaren esparruan lan egiten dut esparru ezberdinetan, denbora luzez Sexuen Hezkuntzan eta honekin bat datorren guztia (izate sexuduna, sexu-identitatea, sexualitatea osotasunean, aniztasunaren aberastasuna, sexuen arteko eskubide berdintasuna…) lantzeko saioak egiten haur eta gazteekin, baita eragile eta gurasoekin ere, honetarako aukerak urriagoak badira ere.
Hezitzaile eta hezia naiz aldi berean, dakidana eman eta egunero besteek ematen didatena jasoz, ume eta gazteengandik bizitzarako baliagarriak zaizkidan gauza asko ikasiz. Hala ulertzen dut bizitza, ikas prozesu amaigabe bezala, zeinean egunero, edonork eta edonon zerbait erakutsiko didan.

Amatasuna duela 14 urte hasitako ikas prozesu konzientea da, nahigabe ordea, jaio bezain pronto hasi nuena, neska izateak suposatzen zuena ikastearekin batera ama izateko ereduak ere barneratu nituelako.
Eta hala nola nabil hainbeste urtetan ikasitakoak ahantziz eta emakume, ama, lagun, bikote, feminista, langile,…izateko bide propioak bilatuz. “Ni” pertsonala, bakarra, berezia, askea eta asea eraikiz.

Proiektu interesgarri honetan nire aportazio xumea egiten dut hitzez baliatuz, nire hausnarketa pertsonalak zuekin partekatuz eta zuentzako, beste gurasoentzako, baliagarriak izango direlaren itxaropenaz.

Nire hitzetatik bakar bat poltsikoan sartuko bazenute, pozik!