Udan ere egoki elikatu eta zaindu behar dugu gure burua. Kontuz eguzkiak, bainuak, ariketa fisiko desegokiak eta beroak eragin diezazkiguken osasun arazoekin.

Captura de pantalla 2015-09-30 a las 18.43.16

Udan, bizitza aldatu egiten da: beste erritmo bat, bestelako elikadura, oporrak, natura, aisialdiak, jolasak eta ariketa fisikoa… baina udan eguzkiak, bainuak, ariketa fisikoak, beroak edo elikadurak osasun arazoak eragin diezazkiguke. Eta umeen kasuan zer esanik ez! Horregatik hobe da horiei aurre hartzea.

Elikadura

Urte sasoirako egokiak diren elikagaiak behar ditugu, eta neurriak hartu behar dira ez izateko ez beherakorik ez deshidrataziorik. Jan denetik, baina batez ere fruta, barazkiak eta entsalada asko. Gordinik janez gero ondo garbitu. Kontuz gordinik dauden edo gutxi eginda dauden arrautzekin.

Ondo mantendu janaria beroak oso erraz hondatzen duelako.

Edan bi litro ur egunean. Kontuz azukrea, gasa edo alkohola duten edariekin.

Beroa

Beroa atsegina da, baina handiegia denean arriskutsua izan daiteke. Pertsona osasuntsuetan ere deshidratazioa, akidura, karranpak, azaleko erupzioak edo eguzki-kolpea eragin ditzake. Beroak edonori egin diezaioke kalte, baina, bereziki 65 urtetik gorakoek eta 5 urtetik beherakoei, bularreko haurrei batez ere. Baita ere jende lodiari, gaixoei edo botika jakin batzuk hartzen dituztenei zein ahalegin fisiko handia eskatzen duen lana egiten duen jendeari.

Beroak eragindako kalteei aurre egiteko kontrolatu gorputzaren tenperatura eta esfortzu fisiko handieneko ariketak tenperatura baxueneko orduetan egin: erosketak, garbiketa lanak, ibiltzea, baratzeko edo lorategiko lana, lana, kirola… Gainera, ur eta edari fresko gehiago edan, egarriak ez bagaude ere. Umeen kasuan eskaini ura sarri; batez ere eskatzeko gai ez direnei.

Saiatu fresko egoten, erabili arropa argia, zabala eta arina.

Kontuz inor geldirik eta itxita dagoen ibilgailu baten barnean uztearekin, are gehiago eguneko ordu beroenetan eta eguzkipean.

Eguzkia

Eguzkia ona da hezurrentzat, azaleko zenbait arazotarako, gogo-aldarterako… baina gehiegi hartuz gero erredurak, eguzki-kolpea, begi-lausoa eta larruazaleko minbizia sor ditzake.

Hala, garrantzitsua da hasieran denbora gutxian hartzea eguzkia. Ez egon eguzkitan ez denbora luzean ez eguneko ordu beroenetan (12:00etatik 16:00etara). Egokia den babes faktorea duen krema erabili, eta eguzkitan jarri baino ordu erdi bat lehenago eman, baita gero bi ordutik ere. Eta erabili eguzkitako betaurrekoak.

Haurrak bereziki babestu: txanoa eta kamiseta jantzi, daudela itzalean, edatera eman…

Bainua

Arriskuak ditu, baita ere, itsasoan edo igerilekuan bainatzeak, haurtzaroan batez ere. Hala, saihestu:

. Gehienez bainuak 20-30 minutu iraun dezala, eta minutu bakar batzuk umea urtebetetik beherakoa denean.

. Zaindu umeak BETI, batez ere igerian ondo ez badakite. Bete hondartzako edo igerilekuko segurtasun arauak.

. Poliki sartu uretan, batez ere eguzkitan egon edo otordua egin ondoren.

Eta beti, sukar handia izanez gero edo zorabiatu edo konortea galduz gero kontsultatu osasun zerbitzuetan.

Gaiaren inguruan artikulu interesgarria irakurri dugu Berrian.

Argazkiaren iturria hemen.