Txatxilipurdi elkarteak aurten ere mota ezberdinetako udalekuen eskaintza argitaratu du.

Batetik, udaleku itxiak antolatu ditu, Euskal Herriko haurrei zuzenduta. 9 eta 18 urte bitartekoei zuzendutakoak izango dira, eta hiru eskaintza kaleratu dituzte.

Ekainaren 29tik uztailaren 6ra Ozaetako Garai-On gunean antolatu dituzte udalekuetako bi; bata 9-12 urte bitartekoentzat, eta bestea 12-14 adin tartekoentzat. Bestetik, kosta ala kosta udaleku ibiltaria ere antolatu dute, Arrasatetik Mutrikura ibilian joango dena, eta 14-18 urte bitartekoek parte hartu ahal izango dute bertan.

Bestetik, udaleku irekiak antolatu dituzte, gehienbat Arrasate eta inguruko herrietako haurrei begira.

Kategoria honetan, hiru talde osatuko dituzte. Bilin Bolonka taldea 2019 eta 2022 urte artean jaiotakoentzat izango da, Haur Hezkuntzakoentzat, eta 10:00etatik 13:00etara elkartuko dira. Izen-ematea 123 euro izango da.

Bihurrikeixetan taldeari dagokionez, 2016 eta 2018 urte artean jaiotakoentzat izango da, LHko 1, 2 eta 3. mailetakoentzat. Hor, goizez edo egun osoz eman ahalko da izena. Lehenari dagokionez, 10:00etatik 13:00etara izango da eta izen-ematea, 146 euro. Bigarrenean, berriz, 10:00etatik 13:00etara eta 16:00etatik 18:00etara egingo dituzte ekintzak eta izen-emate 169 euro izango da. Edozelan ere, egun osoko taldea sortzeko gutxienez hamar haur beharko dituzte.

Azkenik, Erokeixetan taldea, 2013 eta 2015 urte artean jaiotakoentzat izango da, LHko 4, 5 eta 6.mailetakoentzat. Astean bi egunez 10:00etatik 17:00etara elkartuko dira eta beste hiru egunetan, 10:00etatik 13:00etara. Izen-ematea 169 euro izango da.

Izena emateko, hainbat bide daude: Txatxilipurdiren webgunean; QR kode baten bidez; Txatxilipurdiren bulegoan, astelehenetik eguenera, 09:30etik 13:30era eta 15:00etatik 17:00etara (Nafarroa etorbidea 23, lehen solairua) edo telefonoz (943 79 54 46).