Astelehenean hasi zen udaberria eta ekainaren 21ean hasiko da uda. Orduan helduko da opor garaia etxeko txikienentzako. Aisialdirako ordu gehiago izango dituzte, baina gurasoek lanean jarraituko dute. Eta, opor sasoi guztietan moduan, zalantzak eta kezkak sortzen dira. “Zer egin umeekin?”, hori da guraso askok egiten duten galdera. Bada, zorionez, galdera horrek badu erantzuna: udalekuak. Uda parteko kanpalekuak. Atzerrira hizkuntzak ikastera joatea. Kirola egiteko eskaintza.  

Aukera zabala

Horrenbeste zabaldu da udalekuen eskaintza, askok ikasturtearekin batera egiten dute deialdia. Irailean, hurrengo urteko ekainerako edo uztailerako matrikula egiten dute. Eta zergatik egin horrenbesteko aurrerapenarekin? Plazak bukatu egiten direlako. Aukera handia da.

Interneten sartu eta bilatzailean Udalekuak berba sartu ahalaz bat irteten den zerrenda oso luzea da. Eta orduan sortzen da bigarren zalantza gurasoentzako. Zein aukeratu? Nora bideratu umea? Horren erantzuna bi irizpideren araberakoa izan daiteke: umeak dituen gustuen araberakoa edo eskaintzak duen prezioaren araberakoa.

Prestakuntza eta aisialdia

Udalekuen helburu nagusiak prestakuntza eta aisialdia dira. Naturaz inguratuta edo herriguneetan dauden eraikinetan elkartzen dira neska-mutikoak, begirale batzuen gidaritzapean. Eskaintza bakoitzak duen iraupenaren arabera, askotariko ekintzak egiten dituzte. Udalekuak duen ezaugarrien arabera, oso bestelakoak dira horiek. Kirol konkretu baten inguruan egiten direnek ikastaro trinkoen egitura izaten dute. Kirola bera alde teorikotik eta praktikotik lantzen dute. Normalean, ikasturtean zehar umeak lantzen duen kirol modalitate bera izaten da. Kirolaren diziplina horri bestelako jarduerak gehitzen dizkiote.

Etxetik gertu

Gurasoek gertuen duten eskaintza udal udalekuak dira. Uztailean egiten dituzte eta hilabete irauten dute. Begiraleek prestakuntza berezia izaten dute umeekin ibiltzeko. Etxetik gertu hasita, nahi beste aldendu daitezke neska-mutikoak. Euskal Herrian, Espainiako Estatuan, Europan eta atzerrian. Gazteenak etxetik gertu geratzen dira. Nerabeak, berriz, urrutiago joaten dira.

Europara, turismoa egitera

Udalekuak modan ipini zirenean, gehienek atzerrira joateko aprobetxatu zuten. AEBetara edo Londresera ingelesa ikastera joateko edo umeak zaintzera joan, eta, bide batez, hango jatorrizko hizkuntza barneratu. Azken horrek aukera ematen zuen hango egonaldia bertako familia baten etxean egiteko, eta familiaren egunerokoan murgiltzeko. Egonaldi horiek hilabete osokoak edo bat baino gehiagokoak izaten ziren.

Nerabeek duten beste aukera bat da Interrail delako trena hartu eta Europan zehar bidaiatu. Kasu horretan, hainbat leku eta kultura ezagutzeko aukera dute. Bereziki, turismoari begira egiten diren ihesaldiak izaten dira. Europa alderik alde ezagutzeko aukera ematen duen trena.

Foru aldundiekin

Orain arte aipatutako eskaintzak, normalean, pribatuak izaten dira. Udalek, kirol elkarteek, enpresa pribatuek, norbanakoek… antolatzen dituztenak. Beste aukera bat udaleku publikoak izaten dira. Besteak beste, Gipuzkoako, Arabako eta Bizkaiko foru aldundiek antolatzen dituztenak. Adinaren arabera, bitan banatzen dira: 7-13 urte artekoendako Udalekuak eta 14-17 artekoendako Gazte Oporraldiak.

Udalekuak Hego Euskal Herriko aterpetxeetan antolatzen dira eta Gazte Oporraldiak, Arabako, Gipuzkoako, Nafarroako eta estatuko nahiz Frantziako beste hainbat tokitan. Eskaintza zabala da eta gazte informazio bulegoetan eta Internet bidez ikus daitezke txandak, datak, prezioak eta bestelako informazioa.

Udaleku horiek duten abantaila prezioa da, merkeagoak direlako. Kontrara, zozketa baten menpe daude interesatuak. Dauden plazak baino neska-mutil gehiagok ematen dutenez izena, plazak zozketatu egiten dira. Neska-mutikoek eskaerak banaka, binaka edo hiruko taldetan egin dezakete. Eta, plazak esleitzeko orduan, ordura arte udalekuetan parte hartu ez dutenei ematen diete lehentasuna.

Azkenik, 18 eta 30 urte artekoek Gazte Auzolandegietan parte hartzeko aukera dute. Izen-ematea apirilean zabalduko da.