Udan, zaindu kanpoko otitisa

Igerilekuan eta hondartzan bainua hartzeak, beroarekin batera, kanpoko otitisa izateko arriskua handitzen du, hezetasunaren ondorioz, Otorrinolaringologia eta Buruko eta Lepoko Kirurgia Elkarteak gogora ekarri berri duen moduan. Ondoko taulan ikus daitekeen gomendio sorta ere kaleratu du, uda honetan otitisa saiheste aldera. (Iturria: Puntua)

Otitisa izateko biztanleriaren sektore ahulenak dira, batetik,  izerdi asko egiten duten pertsonak eta uretan denbora luzeagoa ematen dutenak, eta, bestetik, umeak. Umeen kasuan, gainera, entzunbideak estuagoak dituzte, eta erraztu egiten du ura bertan atxikita geratzea.

Hezetasuna eta izerdia

Bainatu ondoren belarrietan pilatzen den hezetasuna eta bero handiaren ondorioz egiten den izerdia dira kanpoko otitis hedatsuaren arrisku faktore nagusiak –igerilariaren otitis izenez ere ezaguna–. Infekzio mota hau oso ohikoa da udan eta kanpoko entzunbidea estaltzen duen epitelioaren infekzioan datza. Epitelio edo azalak bakterioen eta onddoen infekziotik babesten du entzunbidea, baina hezetasunaren eta beroaren ondorioz, beratzea gertatzen da eta horrek germenen jarduketa ahalbidetzen du.

Otitis mota honetatik eratorritako sintoma ohikoenak dira: mina, ondoeza aharrausi egiterakoan zein mastekatzerakoan, azkura, buxadura sentsazioa, entzumen galera txikia eta entzunbidean hezetasun sentsazioa, batzuetan zorne-jario eran. Halakoetan, otorrinolaringologoarengana joatea komeni da, diagnostiko eta tratamendu egokienak zehaztu ditzan.

Argizariak babestu egiten du

Entzunbidean argizaririk ez badago, aukera handiagoa dago igerilariaren otitisa izateko; izan ere, argizariak babestu egiten du entzunbidea. Horregatik, ez da komeni modu sistematikoan kentzea.

Argizari-tapoiak izateko joera duten pertsonen kasuan, garrantzitsua da profesional batek egitea garbiketa uda iritsi aurretik.  Ez da komeni kotoi-zotza eta bestelako objektuak erabiltzea; izan ere, azala urra dezakete eta argizaria entzunbidearen alderik sakonenean itsatsarazi eta gunea babes gabe utzi. Hori gertatuz gero, arazoa areagotu egingo da. Bestalde, entzunbidean objektuak sartu eta hazka egitea ere saihestu egin behar da.

Beste arrisku faktore batzuk dira: dermatitis alergikoak, estresa, hauts askodun lekuak eta uren kutsadura bakteriano edo kimikoa.

Bestalde, badira zenbait pertsona bereziki kontuz ibili behar direnak eta tapoi otikoak, zintak eta bainurako txanoak erabili behar dituztenak entzunbidera ura sartzea ekiditeko. Dermatitis aurrekariak dituzten pertsonak dira, entzunbidearen exostosia, tinpanoa zulatuta, ebakuntzaren bat eginda belarrian, diabetesa eta immunoeskasia.

Kanpoko otitis hedatsuaren tratamendua izan daiteke belarrian bertan tanta antibiotiko-kortikosteroideak emanda eta ahotik antiinflamatorioak hartuta. Garatuago dauden kasuetan, beharrezkoa izango da ahotik antibiotikoa hartzea.

Komeni da jakitea, bestalde, sendatu eta gero ere agerraldi gehiago gerta daitezkeela, lehenago esandako moduan, badirelako zenbait pertsona gaitza errazago har dezaketenak. Horregatik da horren garrantzitsua prebentzioa.

Otitisa saihesteko aholkuak
• Belarriaren kanpoko aldea eta entzunbidea sikatu uretatik irtetean.
• Murgilketa denbora laburtu; bereziki, umeen kasuan.
• Bainurako txanoak eta tapoiak erabili.
• Saihestu bainua kutsatuta egon daitekeen uretan.
• Kotoi-zotzak eta urkilak, zotzak eta antzeko objektuak ez erabili belarriak garbitu edo hazka egiteko.
• Beharrezkoa balitz, belarria lehortzeko ile-lehorgailua erabili, ez erretzeko distantzia egoki batera jarrita.
• Ura entzunbidean atxikita geratuz gero, farmazietan prestatutako alkohol borizatua bota daiteke.
• Argizari-tapoiak sortzeko joera izanez gero, oporren aurretik joan sendagilearengana garbiketa sakona egiteko.
• Entzunbidearen pH-a aldatu eta defentsa mekanismoa txiki  dezakeen esprairik ez bota.
• Otorrinolaringologoarengana joan, mina edo sintomak nabarituz gero.

Argazkiaren iturria: wonderbaba.ie