Eguraldi eguzkitsua ikustean , uda, oporrak, gozamena… datorkigu burura. Eta nola ez, jolasa, jostailuak eta lagun artean une atseginak pasatzeko gogoa.

Oraingoan, Gabon garaian egiten duten bezala, udarako jostailuak trukatzea proposatu dute Arrasateko Txatxilipurdi elkartekoek.

Arantza Osororekin hitz egin dugu egitasmoaren nondik norakoak ezagutzeko.

Etxean dauzkagun jostailuei begirada bat bota eta erabiltzen ez ditugunak beste batzuengatik trukatzeko aukera luzatu nahi du Txatxilipurdi elkarteak. Edonolako jostailuak trukatu ahalko dira baina uda gerturatzen ari dela eta, Gabonetan gogoratzen ez garen jostailu mota horiek ere trukatzea proposatu nahi dute. Hondartzan edo igerilekuetan erabili izan ditugun jostailu horiek: kuboak, palak, eskuare, kometak, urpean jolasteko jostailuak, ureztontziak , hondarretan jolasteko jostailuak, disko hegalariak…

Jostailuak biltzeko egun bakarra izango da oraingoan, beraz, argi ibiltzea komeni da. Maiatzaren 21ean, ostiral arratsaldean, Arrasateko gune ezberdinetatik pasatuko da Txatxilipurdiko furgoneta jostailuak biltzen:

–          16:30-17:30ak bitartean Sebero Altube plazan jasoko dira.

–          17:45-18:45ak bitartean Santamarinako ludoteka aurrean.

–          19:00-20:00ak  bitartean Arimazubi plazan.

Jostailuen truke, txartelak banatuko ditugu, zenbat jostailu hainbeste txartel.

Txartel horiekin,  Ekainaren 4an, ostirala, jasotako jostailuen artean beste batzuk aukeratzeko beta egongo da.

Indarkeria sustatzen dituzten jostailuak ez dira onartuko ez eta irudi sinbolikoa dutenak ere, tartean pistolak, izan uretakoak edo ez. Bestalde, sexu bereizketa egiten duten jostailuak ere ez dira onartuko. Eta nola ez, jostailuak egoera onean eta osorik egon beharko dira.

Ekainaren 4an Monterrongo parkean, jasotako jostailuak ikusgai jarriko dituzte eta trukea aurrera eramango da. Bertan, jokoak azaltzeko  eta elkarrekin jolasteko tartea hartuko dute. 18:00etatik 20:00etara bitartean egongo dira eta segurtasun neurriak bermatuz, nahi duen orok parte hartzeko aukera izango du.

Segurtasun neurriak betetzea norbere ardurapean egongo da.