UEU Udako Euskal Unibertsitateak antolatutako udako ikastaroen baitan, hezkuntzaren alorreko ikastaro eta jardunaldi batzuen berri eman digute. Gurasoentzako interesgarriak  izan daitezkeenak  bildu ditugu. Ikastaroen inguruko informazio osoa.

Mindfulness edo Arreta Osoa hezkuntzan. Uztailaren 4 eta 5ean, Baionan.

Arreta Osoa, “mindfulness” ingelesez, orain eta hemen izaten ari garen esperientziari irekita dagoen arreta egoera da. Osoko esperientzia horretan gure gorputz, arnasa, sentsazio, pentsamendu eta gure inguruaz jabetzen gara.

Mendebaldeko moldeetara ekarritako Ekialdeko tradizioen filosofia eta praktika laiko honen erabilerak lasaitasuna, enpatia, eta oldarkortasunaren kontrola ekar ditzake ikasgelara, eta ikasleen gaitasun kognitiboa zabaltzera lagundu.

Halaber, zuzeneko eragina dauka ikastorduen bilakaeran, giro lasaian edukiak errazago eta osoago eman daitezkeelako, horrek irakasleentzat ere dakartzan osasun eta motibazio onurekin.

Guraso/hezitzaile eta haurren elkar ulertzea: zigorrak, xantaiak eta mehatxurik gabeko harremanak. Uztailaren 7 eta 8an, Baionan

• Ez baduzu oraintxe bertan jasotzen zure gela ez duzu telebistarik ikusiko!
• Platereko dena jaten baduzu, txokolatea emango dizut.
• Eskolako notak onak badira, Nintendoa erosiko dizut!
• Gosaldu eta jantzi, eskolara berandu iritsiko gara eta!
• Niri ez hitz egin tonu horretan!

Sarritan, guraso eta hezitzaileak gauza bera 100 aldiz esaten dugun inpresioa izaten dugu, tonu guztietan, kasu egin baino lehen. Eta honekin batera gure amorrazioa handitzen doa, geure pazientziak gainezka eginaz. Aldi berean, zailtasunak izan ditzakegu gauza bat debekatzeko orduan, exijitzeko orduan… “Ez” esatea kosta egiten zaigu edota gehiegi esaten dugu.

Maiz nahiago genuke beste era batera egin, autoritarismoaren, xantaia eta penaren artean oreka edo erdiko neurria aurkitu, baina ez dugu beste errekurtsorik aurkitzen. Eta sarritan gaizki-ulertuak sortzen dira… Igeri egiten, gidatzen, sukaldean ikastea normaltzat hartzen dugu… Gure autoritatea mantendu, autoritarioa izan gabe, Gure seme-alabekin komunikatzen ere ikas daiteke!

Nola hitz egin haurrei, entzun diezaguten… Nola entzun, hitz egin dezaten…

Irakaskuntzarako bideoak: gidalerroak eta tresnak. Uztailaren 13 eta 14an, EIbarren

Bideoz emandako azalpena Irakaskuntzan ohiko tresna bilakatu da. Irudia, ahotsa eta testua elkarrekin eskaintzen ditu eta tutorial laburretarako oso egokia da. On line edota MOOC ikastaroetan erabiltzen dira gehien, baina ez horietan bakarrik, informazioa era errazean emateko bidea baita bideoa.

Ikastaro honetan bideoak sortzeko gidalerroak emango dira, eta bideoak sortzeko software libreak eskaintzen dituen tresna ahaltsuak ezagutaraziko ditugu. Ahaltsuak izanagatik erabilerrazak diren tresnak, hain zuzen ere. Eta aplikazio horiekin bideoak sortzeko behar diren urrats guztiak ikusiko dira: ikastaroa bukatzerako, norberak sortutako bideoa edukiko du ikasleak.

Adimen gaitasun handiko ikasleei erantzuna eskolan: eguneroko erronka. Uztailaren 14 eta 15ean, Eibarren.

Adimen gaitasun handiei buruzko ezagutza ezak eta mitoek ezaugarri hauek dituzten haurrei egunerokotasunean eskola erantzun aproposa ematea oztopatzen dute. Alde batetik, haur hauek identifikatzeko zailtasunak daude, eta euren ezaugarriak eta jokabideak gaizki interpretatzen dira. Bestetik, identifikatuta dauden haurrekin lan egiteko metodoak eta teknikak zalantzan jartzen dira askotan, beti ez baitira eraginkorrak izaten.

Tailer honen bidez, kontzeptuak argitu eta mitoak aztertuko dira, eta identifikaziorako gakoak eskainiko dira, alde batetik. Bestetik, eskola erantzun eraginkorrerako gakoak aztertu eta proposamen desberdinak eskainiko dira, didaktika desberdinak abiapuntu hartuta. Azkenik, egunerokotasunean eskolako eremuan haurrentzako garrantzitsuak diren eragileen testigantzak jasoko dira, eurek egunerokotasuneko erronkei nola aurre egiten dieten azalduko dutelarik.

Hazi, eraiki, hezi: arkitektura eta hezkuntza espaziala haur eta gazteen garapenean. Uztailaren 13 eta 14an, EIbarren.

Azken aldian bolo-bolo dabilen gaia da arkitektura, espazio publikoa, haurtzaroa edota gaztaroa nahastean dituena. Eta ez dira gutxi honen inguruan lanean dabiltzan pertsona edo taldeak, eta aurrera daramatzaten ekimen eta egitasmoak. Izan ere, hezkuntza espazialak pedagogian eskaintzen dituen aukerak nabarmenak dira.

Oraintsuarte eta oraindik ere alor askotan, umeak eragile hartzaile bezala hartu izan dira, irizpiderik edo erabakiak hartzeko gaitasunik izango ez balute bezala. Nekez garatuko dute gaitasun hau, tresnarik ematen ez bazaie horretarako. Eta esan bezala, badira hainbat talde umeekin tresna hauek maila desberdinetan lantzen.

Lan honek dakartzan onurak, bai beraien norbanako garapenean, bai herritarrengan bere osotasunean, zalantzarik gabe gizarte orekatu eta barneratzaile baten bidean jartzen gaituzte. Ikastaroan, haur eta gazteekin alor ezberdinetan lantzen ari diren ekimenak ezagutu ahal izango ditugu, bai eta hauetan zelako metodologiak garatzen diren ere; eta egiten denetik abiatuta, esparru honetan egiteke dagoen bideari buruz hitz egiteko eztabaida-leku aproposa izango da.