Zarauztik egiten du Zuriñe Darceles youtuberrak Sleeptak kanala. Zuri da bere youtuber izena eta heziketarako bideoak kaleratzen ditu euskaraz eta askotariko edukiekin. “Eskulanak, errezetak, esperimentu errazak, zientzia gaiak… saiatzen naiz eduki orijinalak eskaintzen. Esate baterako animaliak aurkezten ditudanean ez dira txakurra, katua eta antzerakoak izaten. Aurkezten ditut itsas izarra, tximeleta…”, azaltzen du.

Captura de pantalla 2017-01-30 a las 20.27.47

Haur Hezkuntzako ikasketak egin ditu Zurik eta bere helburu nagusia da gurasoek umeekin batera denbora pasatzea. “Uste dut umeei arreta pixka bat gehiago jarri beharko geniekeela. Aisialdi denbora gehiago partekatu beharko genuke seme-alabekin. Jarduera pila batera apuntatzen ditugu baina ez dira gurekin egindakoak eta kasketa harrapatzen dutenean isil arazteko sarri mugikorra ematen ikusten ditut gurasoak”.

Sleeptak 3-6 urte bitarteko umeentzako egokiak diren bideoak daude ikusgai. “Ideia 2012an sortu zen baina 2015eko udan jarri nuen martxan”, azaltzen du youtuberrak. “Formatu egokia aurkitu, animazioetarako pertsonaiak sortu… Gainera, gurasoentzako eta umeentzako edukiak jorratu nahi nituen eta ez nuen bateratzeko formula egokia aurkitzen. Azkenean, bi kanal sortzea erabaki nuen”.

Eta horrela dihardu Zurik. Sleeptak umeei zuzendatuko youtuber kanala da baina badu beste bat, Yumetoki kanala hain zuzen ere. Bertan gurasoei zuzendutako edukiak argitaratzen ditu eta gazteleraz. “Haurdunaldia, txertoak, pedagogia filosofiak, ipuin gomendioak… denetarik lantzen dut. Aholkuak ere ematen ditut. Laster, esate baterako, oihalezko pardelei buruzko bideo batzuk egin nahi ditut gurasoak informatzeko”, azaldu du.

Estudio txiki bat prestatu du Zurik etxean. “Nik egiten dut dena: gidoia, grabaketa, muntaketa lana, azpitituluak… Koaderno txiki bat daukat eta bertan idazten ditut burura etortzen zaizkidan ideiak”. Orain arte hilean bideo bat zintzilikatu du Sleeptak kanalean eta bi Yumetokin. “Otsailetik aurrera saiatuko naiz gurasoen kalanean lau sarrera egiten eta umeenean bi”.

Harrera oso ona izan dute bai Sleeptak bai Yumetoki kanalek. “Ez nuen pentsatzen eta gaur egun 500 jarraitzaile inguru ditut. Hartu-emana, gainera, oso handia da”. Jasotako erantzuna ikusita Zurik dio bazegoela horrelako eskaintza baten beharra. “Umeentzako edukiak gehienetan gazteleraz daude, eta eskaintza ezberdina da nik egiten dudana”.