Ur eremura egokitu eta beldurra kendu

Jaioberriak uretan trebatzea oso garrantzitsua dela diote adituek. Ur ingurunea ezagutu eta uretan moldatzen jakitea ezinbestekoa da, umeek uretan arazorik ez izateko. Gaiaren inguruan idatzi du Arantzazu Ezkibelek Puntua aldizkarian.

Ez dago adin zehatzik umea igerilekura eramaten hasteko. Udalerri gehienetan sei hilabetetik aurrerako umeendako eskaintza dago; hala ere, adinik onena umeak berak markatuko du.

Glotisa ixteko ahalmena

Ume txikiek bizirauteko berezko dituzten hainbat erreflexu dituzte. Horien artean badaude ur eremuetarako ezin hobeto datozkienak.

Erreflexu horietako bat da eztarria edo glotisa ixteko duten ahalmena. Jaioberria bere osotasunean uretan murgiltzen badugu, arnasbideak urez bete ez daitezen, zintzur-hesteko hodian dagoen balbula baten bitartez arnasbideak itxiko ditu. “Amaren sabelean zeuden egoera gogoratu, eta glotisa ixten dute”, azaldu du Mertxe Anduagak, Oñatiko igerilekuko begiraleak. Nahigabeko apnea esaten zaio horri. Beste erreflexu bat ez urperatzeko gaitasuna da. Jaioberriek proportzioan burua handia dute; bada, hain zuzen, buruak gorantz egiten duen flotagailuaren lanak egingo ditu. Badago beste erreflexu bat: jaioberriak uretan beso eta hankak mugitzen ditu; mugimendu horiek oreka-desoreka saiakerak dira. Bergarako Kirol teknikari Unai Azurmendik dio: “Ikertzaile batzuek diote erreflexu horiek sei eta bederatzi hilabete bitartean desagertzen direla”. Horregatik da gomendagarria ur jarduerak sei hilabetetik aurrera egitea. Hala ere, Azurmendik lasaitasun mezua zabaldu gura du: “Zuetako zenbatek parte hartu duzue haur zinetenean mota horietako ur jardueretan? Garapenean oztoporik izan duzue? Ez, noski”.

Ume-guraso harremana

Umeak igerilekura aitarekin edo amarekin joatea da egokiena –aitaita-amamekin edo zaintzailearekin ere joan daitezke, baina gomendagarria da oso gertuko pertsona izatea, umea lasai eta seguru egon dadin–. Modu horretan, uretako jarduerak bi helburu izango ditu: batetik, umeari berari dagozkionak; eta, bestetik, jaioberriaren eta gurasoen arteko harremanari dagozkionak.

Uraren egoera

Uraren tenperaturak 31 eta 32 gradu bitartekoa izan behar du eta saioaren iraupenak ez luke 30 minutu baino gehiagokoa izan behar. “Batetik, haurra hoztu egin daitekeelako; eta, bestetik, saioak oso intentsuak izaten direnez, umearen emozioak pil-pilean egoten dira”, azaldu du Azurmendik.

Kloroaren gaiak guraso asko arduratzen ditu. Azurmendik dio kloroa desinfekziorako erabiltzen dela, baina “oso maila altuetan” kalte egin dezakeela. Espainiako pneumologia eta bularraldeko kirurgia elkarteak arriskuan egon daitezkeen erabiltzaileen parean ipini ditu umeak. “Arrazoia da arnas aparatua garatzen ari direla eta helduek baino sentsibilitate handiagoa diotela kloroari”, dio Azurmendik. Hala ere, Azurmendik dio gurasoek ez dutela zertan larritu: “Gure proposamena asteko saioak bitara mugatzea da”; eta gaineratu du urteak direla jaioberriak klorotan “bataiatzen” direla.

Beldurra kendu

Anduagaren eta Azurmendiren esanetan, Debagoieneko igerilekuetan egiten dituzten ikastaroen helburua ez da umeek “igeri egiten” ikastea. Ikastaro horietan, umeak urari beldurra kenduko dio eta hainbat teknika ikasiko ditu uretan lasai eta beldur barik ibiltzeko. Oñatiko Zubikoa kiroldegian astean bi saio egiten dituzte iraila eta ekaina bitartean. Bergarako Agorrosinen, aldiz, hiru hilabeteko ikastaroak izaten dira: “Gurasoei erreminta batzuk erakusten dizkiegu, trebatu egiten ditugu, umearekin uretan gustura egoteko”, dio Azurmendik; eta gaineratu du: “Helburua da, behin ikastaroa eginda, gurasoak eurak etortzea umearekin igerilekura”. Umeak gustura egoteko, Agorrosingo bainuetxean egiten dituzte ikastaroak. Ura 33 gradutan izaten dute bainuetxean.

Argazkia: abcdelbebe.com